തിരുവനന്തപുരം : സംസ്ഥാനത്തെ ഏഴ് ജില്ലകളിലെ 12 തദ്ദേശ സ്വയംഭരണ വാര്‍ഡുകളില്‍ ഇന്ന് ഉപതെരഞ്ഞെടുപ്പ് നടക്കും. ക്രമീകരണങ്ങള്‍ പൂര്‍ത്തിയായതായി സംസ്ഥാന തെരഞ്ഞെടുപ്പ് കമ്മിഷന്‍ അറിയിച്ചു.
കൊല്ലം, ആലപ്പുഴ, കോട്ടയം, മലപ്പുറം , കോഴിക്കോട് , വയനാട് , കണ്ണൂര്‍ ജില്ലകളിലെ ഒന്‍പത് ഗ്രാമപഞ്ചായത്ത് വാര്‍ഡുകളിലും മലപ്പുറം, വയനാട് ജില്ലകളിലെ രണ്ട് നഗരസഭാ വാര്‍ഡുകളിലും ആലപ്പുഴയിലെ ഒരു ബ്ലോക്ക് പഞ്ചായത്ത് വാര്‍ഡിലുമാണ് ഉപതെരഞ്ഞെടുപ്പ്.
വോട്ടെടുപ്പ് രാവിലെ ഏഴിന് ആരംഭിച്ച് വൈകിട്ട് അഞ്ചിന് അവസാനിക്കും. വോട്ടെണ്ണല്‍ നാളെ രാവിലെ 10ന് ആരംഭിക്കും.
ഉപതെരഞ്ഞെടുപ്പ് നടക്കുന്ന ജില്ല, ഗ്രാമപഞ്ചായത്ത്, വാര്‍ഡ് എന്ന ക്രമത്തില്‍. കൊല്ലം- ആദിച്ചനല്ലൂര്‍- തഴുത്തല തെക്ക്, തേവലക്കര- കോയിവിള പടിഞ്ഞാറ്, ആലപ്പുഴ- ചേര്‍ത്തല തെക്ക്- കളരിക്കല്‍, കണ്ടല്ലൂര്‍- കൊപ്പാറേത്ത് എച്ച്.എസ്, കോട്ടയം-പാമ്പാടി- കാരിയ്ക്കാമറ്റം, കാഞ്ഞിരപ്പള്ളി- മാനിടുംകുഴി, മലപ്പുറം- പെരുവള്ളൂര്‍- കൊല്ലംചിന, കോഴിക്കോട്- തിക്കൊടി-പുറക്കാട്, കണ്ണൂര്‍- രാമന്തളി- രാമന്തളി സെന്‍ട്രല്‍.
ആലപ്പുഴ ജില്ലയില്‍ ചെങ്ങന്നൂര്‍ ബ്ലോക്ക് പഞ്ചായത്തിലെ വെണ്മണി വെസ്റ്റ് വാര്‍ഡിലും മലപ്പുറം ജില്ലയില്‍ തിരൂര്‍ നഗരസഭയിലെ തുമരക്കാവ്, വയനാട് ജില്ലയില്‍ കല്‍പ്പറ്റ നഗരസഭയിലെ മുണ്ടേരി വാര്‍ഡിലുമാണ് ഉപതെരഞ്ഞെടുപ്പ്.