ആലപ്പുഴ: തിരുവല്ല മുതല്‍ മാവേലിക്കര വരെയുള്ള റോഡില്‍ കാലാകാലങ്ങളില്‍ നടത്തേണ്ട അറ്റകുറ്റപണികള്‍ കൃത്യമായി ചെയ്യണമെന്നു സംസ്ഥാന മനുഷ്യാവകാശ കമ്മിഷന്‍. റോഡിന്റെ ഇരുവശങ്ങളിലുമുള്ള ഗര്‍ത്തങ്ങള്‍ നികത്താന്‍ നടപടി സ്വീകരിക്കണമെന്നും കമ്മിഷന്‍ ആവശ്യപ്പെട്ടു.
അതോടൊപ്പം റോഡും റോഡിന്റെ വശങ്ങളും തമ്മിലുള്ള വ്യത്യാസം കുറച്ച് ഒരേ നിരപ്പിലാക്കുന്നതിനുള്ള നടപടികളും കൈക്കൊള്ളണമെന്ന് കമ്മിഷന്‍ ആക്റ്റിങ് അധ്യക്ഷന്‍ പി. മോഹനദാസ് ഉത്തരവില്‍ പറഞ്ഞു.റോഡിന്റെ എസ് വളവുകളില്‍ ഹമ്പുകള്‍ സ്ഥാപിക്കാന്‍ നടപടി സ്വീകരിക്കണം. റോഡ് നിര്‍മാണം പൂര്‍ത്തിയാക്കി അഞ്ച് വര്‍ഷ കാലയളവിനുള്ളില്‍ ഉണ്ടാകുന്ന കുഴികളും മറ്റ് അറ്റകുറ്റ ജോലികളും കരാറുകാരെ കൊണ്ട് സമയബന്ധിതമായി ചെയ്തു തീര്‍ക്കാന്‍ നടപടി സ്വീകരിക്കണം.
കായംകുളം-തിരുവല്ല പാതയില്‍ കെ.എസ്.റ്റി.പി നിര്‍മിച്ച റോഡുകള്‍ ടാറുകള്‍ ഇളകി ഗര്‍ത്തങ്ങള്‍ രൂപപ്പെട്ടുവെന്നാരോപിച്ച് ബി. ജയകുമാര്‍ ഫയല്‍ ചെയ്ത കേസിലാണ് നടപടി. കുഴികള്‍ സമയബന്ധിതമായി നികത്തുന്നുണ്ടെന്ന് കെ.എസ്.റ്റി.പി യുടെ റിപ്പോര്‍ട്ടില്‍ പറയുന്നു. ജലഅതോറിറ്റിയുടെ പൈപ്പിലുണ്ടാകുന്ന ലീക്ക് അടയ്ക്കാത്തത് കാരണമാണ് പല സ്ഥലത്തും കുഴികള്‍ രൂപപ്പെടുതെന്നും റിപ്പോര്‍ട്ടില്‍ പറയുന്നു.പൊതുമരാമത്ത് എക്‌സിക്യുട്ടീവ് എന്‍ജിനീയര്‍ക്കും കെ.എസ്.റ്റി.പി ചീഫ് എന്‍ജിനീയര്‍ക്കുമാണ് കമ്മിഷന്‍ നിര്‍ദേശം നല്‍കിയത്.