ഇരിട്ടി: ഇരിട്ടി-പേരാവൂര്‍ റൂട്ടില്‍ കാക്കയങ്ങാട് കല്ലേരിമലയില്‍ സ്വകാര്യ ബസ് നിയന്ത്രണം വിട്ട് മരത്തിലിടിച്ച് 28 പേര്‍ക്ക് പരുക്ക്. പേരാവൂരില്‍ നിന്നു ഇരിട്ടിയിലേക്ക് വരികയായിരുന്ന ഷൈന്‍സ്റ്റാര്‍ ബസാണ് അപകടത്തില്‍പെട്ടത്. ഇന്നലെ വൈകിട്ട് 5.30ഓടെ കല്ലേരിമലയിലെ ഇറക്കത്തില്‍ നിയന്ത്രണം വിട്ട ബസ് റോഡരികിലെ മരത്തില്‍ ഇടിക്കുകയായിരുന്നു. പരുക്കേറ്റവരെ ഇരിട്ടി, കണ്ണൂര്‍, തലശ്ശേരി എന്നിവിടങ്ങളിലെ ആശുപത്രികളില്‍ പ്രവേശിപ്പിച്ചു. അപകടം നടന്ന് 20 മിനിട്ടിനുശേഷമാണ് രക്ഷാപ്രവര്‍ത്തനം നടന്നത്. റോഡരികിലെ അപകടം കണ്ടിട്ടും പല വണ്ടികളും നിര്‍ത്താതെ പോയി. അതുവഴി വരികയായിരുന്ന ജില്ലാ പഞ്ചായത്ത് അംഗം തോമസ് വര്‍ഗീസിന്റെ വാഹനത്തിലാണ് പലരെയും ആശുപത്രിയില്‍ എത്തിച്ചത്.