കാസര്‍കോട്: കോളജ് കാംപസിനകത്ത് ഇരിക്കുകയായിരുന്ന എം.എസ്.എഫ് പ്രവര്‍ത്തകരായ വിദ്യാര്‍ഥികള്‍ക്കു മര്‍ദനമേറ്റു. കാസര്‍കോട് ഗവ. കോളജില്‍ ഇന്നലെ രാവിലെ പത്തരയോടെയാണു സംഭവം. കോളജിലെ മൂന്നാം വര്‍ഷ ബി.കോം വിദ്യാര്‍ഥിയും കോളിയടുക്കത്തെ അബ്ദുല്ലയുടെ മകനുമായ അഷ്ഫാഖ് (21), ബി.കോം രണ്ടാം വര്‍ഷ വിദ്യാര്‍ഥിയും ബന്തിയോട്ടെ മുഹമ്മദിന്റെ മകനുമായ സഫാഫ് (19) എന്നിവര്‍ക്കാണ് അക്രമത്തില്‍ പരുക്കേറ്റത്. ഇരുവരെയും കാസര്‍കോട് ജനറല്‍ ആശുപത്രിയില്‍ പ്രവേശിപ്പിച്ചു.
സഫാഫും അഷ്ഫാഖും കാംപസില്‍ സഹപാഠികളോടു സംസാരിച്ചുകൊണ്ടിരിക്കുന്നതിനിടെ പുറത്തു നിന്നുമെത്തിയ സംഘം ഇരുവരെയും പിടികൂടി മര്‍ദിച്ചുവെന്നാണു പരാതി.
സിപിഎം പ്രവര്‍ത്തകരാണു കോളജിനകത്തു കയറി അക്രമം നടത്തിയതെന്ന് എം.എസ്.എഫ് ആരോപിച്ചു.