നാദാപുരം: എക്‌സൈസ് നടത്തിയ പരിശോധനയില്‍ വാഷും നിര്‍മിക്കാന്‍ സൂക്ഷിച്ച ഉപകരണങ്ങളും പിടികൂടി. വിലങ്ങാട് വാളാന്‍തോട് പരിസരത്ത് താല്‍ക്കാലിക ഷെഡ് കെട്ടി നിര്‍മാണം നടത്തിയിരുന്ന കേന്ദ്രത്തില്‍ നിന്നാണ് 200 ലിറ്റര്‍ വാഷും നിര്‍മാണത്തിന് ഉപയോഗിച്ചിരുന്ന അലുമിനിയം പാത്രങ്ങളും പ്ലാസ്റ്റിക് കന്നാസുകളും പിടി കൂടിയത്. ഇവിടെ നിര്‍മിക്കുന്ന വ്യാജമദ്യം പുറത്തു കടത്തി വന്‍വിലക്ക് വില്‍ക്കുന്ന സംഘം ആദിവാസി കോളനികള്‍ കേന്ദ്രീകരിച്ച് പ്രവര്‍ത്തിക്കുന്നതായി വ്യാപക പരാതി ഉയര്‍ന്നിരുന്നു.
തുച്ഛമായ പ്രതിഫലം നല്‍കി ആദിവാസി യുവാക്കളെയാണ് ഈ സംഘം മദ്യക്കടത്തിന് ഉപയോഗിക്കുന്നത്. നിരവധി ആദിവാസി യുവാക്കള്‍ ഇത്തരം കേസുകളില്‍പ്പെട്ട് വിവിധ ജയിലുകളില്‍ കഴിയുന്നുണ്ട്. മലയോര മേഖലയായ വിലങ്ങാട് കേന്ദ്രീകരിച്ചു മാഹിമദ്യവും വന്‍തോതില്‍ വില്‍പ്പന നടക്കുന്നതായി ആരോപണമുണ്ട്. എക്‌സൈസ് സംഘങ്ങള്‍ക്ക് കടന്നെത്താന്‍ കഴിയാത്ത ഇവിടങ്ങളിലെ ഭൂമിശാസ്ത്രഘടന വാറ്റു സംഘങ്ങള്‍ക്ക് അനുകൂലമാണ്.