തിരൂരങ്ങാടി: തിരൂരങ്ങാടി വിദ്യാഭ്യാസ ജില്ല ഏര്‍പ്പെടുത്തിയ മികച്ച സ്‌കൗട്ട് യൂനിറ്റിനുള്ള പ്രഥമ എന്‍.കെ. മത്തായി മാസ്റ്റര്‍ അവാര്‍ഡ് തിരൂരങ്ങാടി ഒ.യു.പി സ്‌കൂള്‍ സ്‌കൗട്ട് യൂനിറ്റ് കരസ്ഥമാക്കി. 2016-17 വര്‍ഷത്തെ മികവാര്‍ന്ന പ്രവര്‍ത്തനങ്ങള്‍ക്കാണ് അവാര്‍ഡ്. നിറമരുതൂര്‍ ജി.എച്ച്.എസ് എസില്‍ നടന്ന ജില്ലാ സെമിനാറില്‍ താനൂര്‍ എം.എല്‍.എ. വി അബ്ദുറഹിമാനില്‍ നിന്ന് സ്‌കൗട്ട് അധ്യാപകരായ കെ.അബ്ദുറഹിമാന്‍, ഒ.പി അനീസ് ജാബിര്‍, വി.കെ. സിദ്ധീഖ്, എ.പി. സുലൈഖ, എ. നദീറ എന്നിവര്‍ അവാര്‍ഡ് ഏറ്റുവാങ്ങി.
പാവപ്പെട്ട രോഗികള്‍ക്കുള്ള സഹായം 'കൈത്താങ്ങ് ' പദ്ധതി, 'ജീവജലത്തിനായ് അല്‍പം ശ്രദ്ധ' ബോധവല്‍ക്കരണ പരിപാടി, പ്ലാസ്റ്റിക് നിര്‍മാര്‍ജനം, സ്വയം തൊഴില്‍ പരിശീലനം, പാവപ്പെട്ട കുട്ടികളെ ദത്തെടുത്ത് പഠന സഹായം നല്‍കല്‍, തുടര്‍ച്ചയായി പതിമൂന്നാം തവണയും നടത്തിയ സഹവാസ ക്യാംപ് ഉള്‍പ്പടെ ഒട്ടനവധി പ്രവര്‍ത്തനങ്ങളുടെ മികവാണ് സ്‌കൂളിനെ അവാര്‍ഡിന് അര്‍ഹരാക്കിയത്.