പാലക്കാട് ജില്ല ആശുപത്രിയില്‍ ചികിത്സ കിട്ടാതെ രോഗി മരിച്ചതായി ബന്ധുക്കള്‍ ആരോപിച്ചു. കൊടുവായൂര്‍ കാക്കയൂരിലെ കണ്ടന്‍ (78) ആണ് മരിച്ചത്. ഉച്ചക്ക് 12 മണിയോടെ മരിച്ച കണ്ടന്റെ മൃതദേഹം ഒന്നര മണിക്കൂറിന് ശേഷമാണ് വാര്‍ഡില്‍ നിന്ന് മാറ്റിയത്. ചികിത്സ കിട്ടാത്തതിനാല്‍ രോഗി മരിച്ചതിനെ തുടര്‍ന്ന് മററുരോഗികളും വാര്‍ഡിലുള്ളവരും പ്രതിഷേധിച്ചതിനെതുടര്‍ന്ന് ആശുപത്രിയില്‍ ഏറെ നേരം സംഘര്‍ഷാവസ്ഥയണ്ടായിരുന്നു. മരണത്തിന് ശേഷം ഒന്നര മണിക്കൂറിന് ശേഷമാണ് ബന്ധുക്കളുടെ പ്രതിഷേധത്തെ തുടര്‍ന്ന് ഡോക്ടര്‍ എത്തി മൃതദേഹം പരിശോധിച്ച് മരണം ഉറപ്പാക്കിയിരുന്നു. രോഗി മരണപ്പെട്ടിട്ടും ഡോക്ടര്‍മാരും നേഴ്‌സുമാരും മറ്റും തിരിഞ്ഞു നോക്കാത്തതിനെ തുടര്‍ന്ന് യൂത്ത് കോണ്‍ഗ്രസ് പാലക്കാട് മണ്ഡലം കമ്മിറ്റി പ്രസി. ബോബന്‍ മാട്ടു മന്തയുടെ നേതൃത്വത്തില്‍ പ്രതിഷേധം നടത്തി. തുടര്‍ന്ന് പാലക്കാട് സൗത്ത് എസ.് ഐ യുടെ നേതൃത്വത്തില്‍ പൊലിസ് സംഘമെത്തി രോഗികളുമായി ചര്‍ച്ച നടത്തിയതിനെ തുടര്‍ന്നാണ് മൃതദേഹം കൊണ്ടു പോയത്.
വെളളിയാഴ്ച്ച രാത്രിപതിനൊന്നോടെയാടെയാണ് മരണപ്പെട്ട കണ്ടനെ ചികിത്സക്ക് കൊണ്ടു വന്നത്. രാത്രി ഒരു മണിയോടെ അത്യാഹിത വിഭാഗത്തില്‍ നിന്ന് ഇഞ്ചക്ഷന്‍ നല്‍കി വാര്‍ഡില്‍ കൊണ്ട് കിടത്തുകയായിരുന്നു. പിന്നിട് അച്ഛന്‍ മരണപ്പെട്ട ശേഷം മണിക്കൂറിന് ശേഷമാണ് ഡോക്ടര്‍ വന്ന് പരിശോധിച്ചതെന്ന് മരിച്ച കണ്ടന്റെ മകള്‍ ദൈവാന പറഞ്ഞു. രോഗി മരിക്കാന്‍ കാരണമായ കാര്യങ്ങളെ കുറിച്ച് അന്വേഷിച്ച് നടപടി സ്വീകരിക്കാമെന്ന ആശുപത്രി സൂപ്രണ്ടിന്റെ ഉറപ്പിലാണ് രോഗികള്‍ പ്രതിഷേധം അവസാനിപ്പിച്ചത്. ജില്ലാ ആശുപതിയില്‍ ചികിത്സയില്‍ കഴിയുന്ന 53 രോഗികള്‍ ഡോക്ടര്‍മാരും നേഴ്‌സുമാരും നടത്തുന്ന ചികിത്സ അലംഭാവത്തിനെതിരെ ആശുപത്രി സൂപ്രണ്ടിനും ആരോഗ്യ മന്ത്രിക്കും പരാതി നല്‍കി.