ചവറ: അനധികൃതമായി റോഡിന്റെ ഇരുവശങ്ങളിലും വാഹനങ്ങള്‍ പാര്‍ക്ക് ചെയ്യുന്നത് രൂക്ഷമായ ഗതാഗതക്കുരുക്കിന് കാരണമാകുന്നു.
തേവലക്കര ചേനങ്കര ജങ്ഷനിലും പടപ്പനാലിലുമാണ് ഗതാഗതക്കുരുക്കില്‍ യാത്രക്കാര്‍ വലയുന്നത്. ഇവിടുത്തെ വ്യാപാര സ്ഥാപനങ്ങളിലും മറ്റുംവരുന്നവര്‍ വാഹനം അലക്ഷ്യമായി റോഡിന് ഇരുവശവും പാര്‍ക്ക് ചെയുന്നതാണ് ഗതാഗതക്കുരുക്കാക്കുന്നത്. വാഹനങ്ങളുടെ അനധികൃത പാര്‍ക്കിങ് മൂലം അപകടം ഇവിടെ നിത്യസംഭവമാണ്.സ്ഥലത്ത് ട്രാഫിക്ക് ജീവനക്കാരുടെ സാന്നിധ്യമുണ്ടെങ്കിലും (ഹോംഗാര്‍ഡ്) പലപ്പോഴും അത് പേരിന് മാത്രമാണെന്ന് ആക്ഷേപമുണ്ട്. തെക്കുംഭാഗം പൊലിസിന്റെ അടിയന്തിര ശ്രദ്ധ ഇക്കാര്യത്തിലുണ്ടാകണമെന്ന് നാട്ടുകാര്‍ ആവശ്യപ്പെട്ടു.