ആലുവ: മുസ്‌ലിം പ്രശ്‌നങ്ങളില്‍ മുതലെടുപ്പ് നടത്തി വര്‍ഗീയ ധ്രുവീകരണം നടത്താനുള്ള പോപ്പുലര്‍ ഫ്രണ്ടിന്റെ നീക്കം ഗുരുതരമായ പ്രത്യാഘാതങ്ങള്‍ ക്ഷണിച്ചു വരുത്തുമെന്ന് എസ്.കെ.എസ്.എസ്.എഫ് സംസ്ഥാന കമ്മിറ്റി ആലുവയില്‍ സംഘടിപ്പിച്ച സൗത്ത് കേരള ഡെലിഗേറ്റ്‌സ് മീറ്റ് അംഗീകരിച്ച പ്രമേയത്തില്‍ പറഞ്ഞു.
രാജ്യത്ത് വിദ്വേഷവും അസഹിഷ്ണുതയും വളര്‍ത്താന്‍ സംഘ്പരിവാര്‍ ശ്രമിക്കുകയാണ്. മുസ്‌ലിംകളെ പോലെ, വര്‍ഗീയതക്കെതിരായ നിലപാട് സ്വീകരിക്കുന്ന എഴുത്തുകാരും മാധ്യമപ്രവര്‍ത്തകരും കൊല്ലപ്പെട്ടുകൊണ്ടിരിക്കുന്നു. ഇതിനെതിരായി ഫാസിസ്റ്റു വിരുദ്ധ നീക്കങ്ങള്‍ ഫലപ്രദമാക്കുകയും ഏകീകരിക്കുകയുമാണ് ഇന്നത്തെ സാമൂഹിക ഉത്തരവാദിത്വം. എല്ലാസമുദായങ്ങള്‍ക്കിടയിലും മഹാഭൂരിപക്ഷവുംവര്‍ഗീയതക്കും അസഹിഷ്ണുതക്കുമെതിരേ ചിന്തിക്കുന്നവരാണ്. അത്തരക്കാരെ തെറ്റിദ്ധരിപ്പിക്കാനും അവരില്‍ നിന്ന് മുസ്‌ലിംകളെ അകറ്റുകയുമായിരിക്കും വൈകാരികമായ ഇടപെടലുകളുടെ ഫലം.
ഹാദിയകേസ് കൈകാര്യം ചെയ്യുന്നവര്‍ എന്ന വ്യാജേന അവരെ കൂടുതല്‍ നിയമക്കുരുക്കിലേക്ക് എത്തിച്ചത് ഇത്തരം ഇടപെടലുകളാണ്. ഹാദിയയുടെ വീട്ടുതടങ്കല്‍ തീര്‍ത്തും മനുഷ്യാവകാശലംഘനമാണ്. ഇക്കാര്യത്തില്‍ സര്‍ക്കാരിന്റെ അടിയന്തിര ഇടപെടല്‍ ഉണ്ടാവണം. എന്നാല്‍ സംഘ്പരിവാര്‍-പോപുലര്‍ഫ്രണ്ട് മുതലെടുപ്പുകാരില്‍ നിന്നുകൂടി മോചിതമാകുമ്പോഴാണ് ഹാദിയ കേസില്‍ ശാശ്വത പരിഹാരമാവുകയുള്ളൂ. പ്രമേയം അഭിപ്രായപ്പെട്ടു. ഓണംപിള്ളി മുഹമ്മദ് ഫൈസി ഉദ്ഘാടനം ചെയ്തു. സയ്യിദ് അബ്ദുല്ല തങ്ങള്‍ അല്‍ ഹൈദ്രോസ് അധ്യക്ഷനായി. സയ്യിദ് ശഫീഖ് തങ്ങള്‍, സത്താര്‍ പന്തലൂര്‍, റഷീദ്‌ഫൈസി വെള്ളായിക്കോട്, ഡോ സുബൈര്‍ ഹുദവി ചേകന്നൂര്‍ വിവിധ സെഷനുകള്‍ക്ക് നേതൃത്വം നല്‍കി. നവാസ് പാനൂര്‍, നൗഫല്‍ കുട്ടമശ്ശേരി, ബഷീര്‍ഫൈസി ആലുവ പ്രസംഗിച്ചു. ലീഡേഴ്‌സ് കാരവന്‍ പരിപാടിയില്‍ ശാഖാ പ്രസിഡന്റ്, സെക്രട്ടറിമാര്‍ പങ്കെടുത്തു. കണ്‍വീനര്‍ കെ.എന്‍.എസ് മൗലവി സ്വാഗതവും പി.എം. ഫൈസല്‍ നന്ദിയും പറഞ്ഞു.