മലപ്പുറം: വേങ്ങര ഉപതെരഞ്ഞെടുപ്പില്‍ നടക്കാനിരിക്കുന്നത് അഭിഭാഷക പോരാട്ടം. മത്സര രംഗത്തുള്ള ഇടതു-വലതു മുന്നണികള്‍ക്കു പുറമേ എസ്.ഡി.പി.ഐ സ്ഥാനാര്‍ഥിയും അഭിഭാഷകനാണ്.

മുന്‍ എം.എല്‍.എയും നിലവില്‍ മുസ്‌ലിംലീഗ് മലപ്പുറം ജില്ലാ ജനറല്‍ സെക്രട്ടറിയുമായ അഡ്വ.കെ.എന്‍.എ ഖാദറിനെ യു.ഡി.എഫ് സ്ഥാനാര്‍ഥിയായി മുസ്‌ലിംലീഗ് സംസ്ഥാന ഉന്നതാധികാര സമിതി ഇന്നലെയാണ് പ്രഖ്യാപിച്ചത്.
ഇടതുമുന്നണി സ്ഥാനാര്‍ഥിയായി പി.പി ബഷീര്‍, എസ്.ഡി.പി.ഐ സ്ഥാനാര്‍ഥിയായി മത്സരിക്കുന്ന കെ.സി നസീര്‍ എന്നിവരും അഭിഭാഷകരാണ്. ഇതിനു മുമ്പും മൂവരും നിയമസഭ തെരഞ്ഞെടുപ്പുകളില്‍ മത്സരിച്ചിട്ടുണ്ടെങ്കിലും നിയമസഭയുടെ അകത്തുകയറാന്‍ അവസരം ലഭിച്ചിട്ടുള്ളത് യു.ഡി.എഫ് സ്ഥാനാര്‍ഥി കെ.എന്‍.എ ഖാദറിനു മാത്രമാണ്.

ഒരിക്കല്‍ മത്സരിച്ച മണ്ഡലത്തില്‍ വീണ്ടും മത്സരിക്കാന്‍ അവസരം ലഭിക്കാത്ത മുസ്‌ലിംലീഗിന്റെ അപൂര്‍വം ജനപ്രതിനിധികളിലൊരാളാണ് കെ.എന്‍.എ ഖാദര്‍. അസംബ്ലി രാഷ്ട്രീയ കരിയറില്‍ തോല്‍വി അറിയാതെ മൂന്നാം അങ്കത്തില്‍ വേങ്ങരയില്‍ മത്സരിക്കുന്ന കെ.എന്‍.എ ഖാദര്‍ നേരത്തെ കൊണ്ടോട്ടി, വള്ളിക്കുന്ന് മണ്ഡലങ്ങളെയാണ് പ്രതിനിധീകരിച്ചിരുന്നത്. മുഖ്യധാര പാര്‍ട്ടികളില്‍ ബി.ജെ.പി മാത്രമാണ് ഇനി സ്ഥാനാര്‍ഥി പ്രഖ്യാപനം നടത്താനുള്ളത്.

ഒക്ടോബര്‍ 11ന് നടക്കുന്ന തെരഞ്ഞെടുപ്പില്‍ നാമനിര്‍ദേശ പത്രിക സമര്‍പ്പിക്കാന്‍ 22ാം തിയതി വരേയാണ് സമയം. ഇതുവരെ ഒരാള്‍ മാത്രമാണ് പത്രിക നല്‍കിയത്. രാജ്യത്തെ വിവിധ സംസ്ഥാനങ്ങളിലായി 183 തെരഞ്ഞെടുപ്പുകളില്‍ നാമനിര്‍ദേശ പത്രിക നല്‍കിയ തമിഴ്‌നാട് സേലം സ്വദേശി ഡോ. പത്മരാജനാണ് പത്രിക നല്‍കിയ ഏകവ്യക്തി.
സ്ഥാനാര്‍ഥികളുടെ ചിത്രം തെളിഞ്ഞതോടെ മണ്ഡലത്തില്‍ ഇനി നടക്കാനുള്ളത് തെരഞ്ഞെടുപ്പ് കണ്‍വന്‍ഷനുകളാണ്. യു.ഡി.എഫ് തെരഞ്ഞെടുപ്പ് കണ്‍വന്‍ഷന്‍ ആണ് ആദ്യം നടക്കുക.

നാളെ വൈകിട്ട് ഏഴിന് നടക്കുന്ന യു.ഡി.എഫ് കണ്‍വന്‍ഷനില്‍ മുസ്‌ലിംലീഗ് സംസ്ഥാന പ്രസിഡന്റ് സയ്യിദ് ഹൈദരലി ശിഹാബ് തങ്ങള്‍, പ്രതിപക്ഷ നേതാവ് രമേശ് ചെന്നിത്തല, മുന്‍മുഖ്യമന്ത്രി ഉമ്മന്‍ചാണ്ടി, മറ്റു ഘടകകക്ഷി നേതാക്കള്‍ എന്നിവര്‍ പങ്കെടുക്കും. 21നാണ് എല്‍.ഡി.എഫ് മണ്ഡലം ഉപതെരഞ്ഞെടുപ്പ് കമ്മിറ്റി രൂപീകരണ കണ്‍വന്‍ഷന്‍ നടക്കുക. സി.പി.ഐ.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ ഉദ്ഘാടനം ചെയ്യും.
സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍, എന്‍.സി.പി സംസ്ഥാന ആക്ടിങ് പ്രസിഡന്റ് ടി.പി പീതാംബരന്‍, ജനതാദള്‍ എസ് സംസ്ഥാന പ്രസിഡന്റ് കെ കൃഷ്ണന്‍കുട്ടി എം.എല്‍.എ, ഐ.എന്‍.എല്‍ സംസ്ഥാന ജനറല്‍ സെക്രട്ടറി പ്രൊഫ. എ.പി അബ്ദുല്‍വഹാബ് എന്നിവര്‍ പങ്കെടുക്കും. എന്‍.ഡി.എ തെരഞ്ഞെടുപ്പ് കണ്‍വന്‍ഷന്‍ 22ന് രാവിലെ പത്തിന് നടത്താനാണ് നിശ്ചയിച്ചിരിക്കുന്നത്.
ബി.ജെ.പി സംസ്ഥാന അധ്യക്ഷന്‍ കുമ്മനം രാജശേഖരന്‍ ഉള്‍പ്പെടെയുള്ളവര്‍ പരിപാടിയില്‍ പങ്കെടുക്കും.