ആലപ്പുഴ: മന്ത്രി തോമസ്ചാണ്ടി അനധികൃതമായി കൈവശം വച്ചിരിക്കുന്ന മാത്തൂര്‍ ദേവസ്വത്തിന്റ 34 ഏക്കര്‍ ഭൂമി തിരികെ ലഭിക്കണമെന്നും തട്ടിപ്പിനെ കുറിച്ച് സമഗ്രാന്വേഷണം വേണമെന്നും ആവശ്യപ്പെട്ട് മാത്തൂര്‍ ദേവസ്വം അധികൃതര്‍ ആലപ്പുഴ ജില്ലാ കലക്ടര്‍ ടി.വി. അനുപമയ്ക്ക് പരാതി നല്‍കി. തോമസ് ചാണ്ടിയുടെ കുട്ടനാട്ടിലെ വീടിന്റെ തൊട്ടടുത്തുള്ള ദേവസ്വം ഭൂമി എത്രയും പെട്ടെന്ന് തിരിച്ചു നല്‍കാനുള്ള ഇടപെടല്‍ ഉണ്ടാവണമെന്നുമാണ് പരാതിയിലുള്ളത്.
മന്ത്രി തോമസ്ചാണ്ടിയുടെ കുട്ടനാട്ടിലെ ചേന്നങ്കരിയിലെ വീടിനോട് ചേര്‍ന്ന് പമ്പാനദിയുടെ മറുകരയിലാണ് ഈ 34 ഏക്കര്‍ വിവാദഭൂമി. മാത്തൂര്‍ ദേവസ്വത്തിന്റെ ഈ ഭൂമിയാണ് പോള്‍ ഫ്രാന്‍സിസ് എന്നയാള്‍ വ്യാജ പട്ടയം ഉണ്ടാക്കി സ്വന്തമാക്കിയത്.പിന്നീട് ഈ ഭൂമി തോമസ്ചാണ്ടി വെറും ഏഴു ലക്ഷം രൂപയ്ക്ക് സ്വന്തമാക്കുകയായിരുന്നു. ഇതിനിടയില്‍ ദേവസ്വം കോടതിയെ സമീപിച്ചു. ലാന്‍ഡ് ട്രിബ്യൂണല്‍ അപ്പലറ്റ് കോടതി ഭൂമിയുടെ പര്‍ച്ചേസ് ഓര്‍ഡര്‍ റദ്ദാക്കി. പിന്നീട് ഹൈക്കോടതിയും ഈ ഉത്തരവ് ശരിവച്ചു. നാല് മാസത്തിനകം ഈ ഭൂമി യഥാര്‍ഥ ഉടമയ്ക്ക് തിരിച്ച് കൊടുക്കണമെന്ന നിര്‍ദ്ദേശം 2014 സെപ്തംബറില്‍ നല്‍കുകയും ചെയ്തു. എന്നാല്‍ ഓരോ സാങ്കേതിക കാരണം പറഞ്ഞ് ലാന്‍ഡ് ട്രിബ്യൂണലില്‍ കേസ് നീട്ടിക്കൊണ്ടുപോവുകയാണെന്നാണ് ദേവസ്വത്തിന്റെ ആരോപണം.