ധര്‍മടം: മീത്തലേ പീടികയ്ക്കു സമീപമുള്ള പഴയപാലം പൊളിച്ചുമാറ്റണമെന്ന ആവശ്യം ശക്തം. ഇരുചക്രവാഹനങ്ങളും മീന്‍പിടിത്ത തൊഴിലാളികളുമടക്കം നിരവധി പേര്‍ പാലം ഇപ്പോഴും ഉപയോഗിക്കുന്നുണ്ട്. ഇത് വന്‍ അപകട ഭീതിയാണ് ഉണ്ടാക്കുന്നത്. സമീപത്തു പുതിയ പാലം വന്നതോടെ പഴയപാലം പൊളിച്ചുമാറ്റുമെന്ന് അധികൃതര്‍ പറഞ്ഞിരുന്നെങ്കിലും ഇതുവരെ നടപടി ഉണ്ടായില്ല. പ്ലാസ്റ്റിക്ക് ഉള്‍പ്പെടെയുള്ള മാലിന്യം തള്ളാനുള്ള കേന്ദ്രമായി മാറിയിരിക്കുകയാണ് ഇപ്പോള്‍ ഈ പാലം.
മാലിന്യങ്ങള്‍ വെള്ളത്തില്‍ കലര്‍ന്നു വെള്ളം മലിനമാകുകയും ചെയ്യുന്നുണ്ട്. യാത്രകാര്‍ക്ക് ദുര്‍ഗന്ധം കാരണം നടന്നുപോകാനും പ്രയാസമാണ്. ഏതു സമയവും വീഴാന്‍ സാധ്യതയുള്ളതിനാല്‍ പാലം പൊളിച്ചുനീക്കിയില്ലെങ്കില്‍ വല്‍ ദുരന്തത്തിനാണ് വഴിവെച്ചേക്കുമെന്ന് പരിസരവാസികള്‍ പറയുന്നു. ചിലര്‍ സെല്‍ഫിയെടുക്കാനും ഇവിടേക്ക് വരുന്നുണ്ട്. ഇതും അപകട സാധ്യതയുള്ളതാണെന്നും നാട്ടുകാര്‍ ചൂണ്ടിക്കാട്ടുന്നു.