കണ്ണൂര്‍: കണ്ണൂര്‍ കോട്ടയ്ക്ക് സമീപം വിദ്യാര്‍ഥിനിയെ കടലില്‍ കാണാതായി. മാണിയൂര്‍ സ്വദേശിനി ഹസ്‌നത്തിനെ(19)യാണ് ഇന്നലെ രാവിലെ 9.30ഓടെ കാണാതായത്. ഏച്ചൂരിലെ സ്വകാര്യ കോളജ് വിദ്യാര്‍ഥിനിയാണ്. തനിച്ച് കോട്ടയിലേക്ക് വന്ന വിദ്യാര്‍ഥിനിയെ പിന്നീട് കാണാതാവുകയായിരുന്നു. കോട്ടയുടെ പടിഞ്ഞാറ് വശത്ത് കടലിനോട് ചേര്‍ന്നുള്ള ഭാഗത്ത് വിദ്യാര്‍ഥിനിയുടെ ബാഗും കുടയും കണ്ടെത്തി. തുടര്‍ന്നാണ് കടലില്‍ ചാടിയതായിരിക്കാമെന്ന സംശയമുയര്‍ന്നത്. കണ്ണൂര്‍ സിറ്റി പൊലിസും പിങ്ക് പൊലിസും കോസ്റ്റ് ഗാര്‍ഡ്, അഗ്നിശമനസേനാംഗങ്ങളും സ്ഥലത്തെത്തി. കടല്‍ പ്രക്ഷുബ്ധമായതിനാല്‍ ആദ്യം തെരച്ചില്‍ നടത്താനായില്ല. പിന്നീട് കോസ്റ്റ് ഗാര്‍ഡ്, മുങ്ങല്‍ വിദഗ്ധര്‍ എന്നിവരുടെ നേതൃത്വത്തില്‍ ബോട്ടുകളുടെ സഹായത്തോടെ തെരച്ചില്‍ തുടങ്ങുകയായിരുന്നു. മയ്യില്‍ പൊലിസ് സ്റ്റേഷനില്‍ കേസ് രജിസ്റ്റര്‍ ചെയ്തിട്ടുണ്ട്.