നീലേശ്വരം പള്ളിക്കരയില്‍ മേല്‍പാലം നിര്‍മിക്കാന്‍ പി. കരുണാകരന്‍ എം.പിയുടെ നേതൃത്വത്തില്‍ തുടങ്ങിയ സമരം വിജയിക്കണമെന്ന പ്രാര്‍ഥനയോടെ വിളിപ്പാടകലെ എം. മുഹമ്മദ് കുഞ്ഞിയുണ്ട്. മേല്‍പാലത്തിനായി വര്‍ഷങ്ങള്‍ക്കു മുമ്പു സ്ഥലമേറ്റെടുത്തപ്പോള്‍ ഇദ്ദേഹത്തിന്റെ കട നിന്നിരുന്ന മൂന്നു സെന്റും താമസിച്ചിരുന്ന വീട് ഉള്‍പ്പെടെ 13സെന്റും നഷ്ടപ്പെട്ടിരുന്നു.
തുച്ഛമായ നഷ്ടപരിഹാരമാണ് അന്നു ലഭിച്ചത്.നേരത്തെ നിലനിന്നിരുന്ന വീടിനു അല്‍പം മാറി പുതിയ വീടെടുത്തു. കടയുടെ നേരെ എതിര്‍വശത്ത് എട്ടു വര്‍ഷം മുമ്പ് ന്യൂ സ്റ്റോര്‍ എന്ന പേരില്‍ പുതിയ കടയും തുടങ്ങി. ന്യായമായ നഷ്ടപരിഹാരത്തുകയ്ക്കായി നടത്തിയ കേസില്‍ അനുകൂല വിധിയുണ്ടായിട്ടും ബാക്കി തുക ഇരുവരെയായും ലഭിച്ചിട്ടില്ല.
എം.പി നടത്തുന്ന സമരത്തില്‍ മേല്‍പാലം യാഥാര്‍ഥ്യമാകുന്നതിനൊപ്പം ഈ തുക കിട്ടാനും ഇടപെടലുണ്ടാകുമെന്ന പ്രതീക്ഷയിലാണെന്നു മുഹമ്മദ് കുഞ്ഞി പറഞ്ഞു.