ചെന്നൈ: തമിഴ്‌നാട് രാഷ്ട്രീയം കൂടുതല്‍ കലുഷിതമാകുന്നു. ഭരണകക്ഷിയായ അണ്ണാ ഡി.എം.കെയില്‍ രൂപംകൊണ്ട അധികാരത്തര്‍ക്കം രൂക്ഷമായതോടെ മുഖ്യമന്ത്രി പളനിസാമി പക്ഷവും ടി.ടി.വി ദിനകരന്‍ പക്ഷവും തുറന്ന യുദ്ധത്തിലേക്ക്.
ദിനകരനെതിരേ ശക്തമായ നീക്കം നടത്തിയ നിയമസഭാ സ്പീക്കര്‍ പി. ധനപാല്‍ ദിനകരന്‍ പക്ഷത്തുള്ള 18 എം.എല്‍.എമാരെ അയോഗ്യരാക്കിയത് ചോദ്യം ചെയ്ത് ദിനകരനും എം.എല്‍.എമാരും രംഗത്തെത്തിയത് സര്‍ക്കാരിന്റെ നിലനില്‍പിന് കടുത്ത വെല്ലുവിളിയാണ് ഉയര്‍ത്തുന്നത്.
കഴിഞ്ഞ തിങ്കളാഴ്ചയാണ് ദിനകരന്‍ പക്ഷത്തെ 18 എം.എല്‍.എമാരെ സ്പീക്കര്‍ കൂറുമാറ്റ നിരോധന നിയമത്തിന്റെ അടിസ്ഥാനത്തില്‍ അയോഗ്യരാക്കിയത്. എന്നാല്‍ ഇത് ചോദ്യം ചെയ്ത് എം.എല്‍.എമാര്‍ ഹൈക്കോടതിയെ സമീപിച്ചതോടെ സര്‍ക്കാരിന് മുന്‍പില്‍ പ്രതിസന്ധി രൂക്ഷമായിരിക്കുകയാണ്.
എം.എല്‍.എമാരുടെ ഹരജിയില്‍ ഹൈക്കോടതി ഇന്ന് വാദം കേള്‍ക്കും. ഇന്നലെയാണ് എം.എല്‍.എമാര്‍ സ്പീക്കറുടെ നടപടിയെ ചോദ്യം ചെയ്ത് ഹൈക്കോടതിയെ സമീപിച്ചത്. സ്പീക്കറുടെ നടപടിയെ തുടര്‍ന്ന് 234 അംഗ നിയമസഭയില്‍ ഭരണ പക്ഷത്തിന് വിശ്വാസവോട്ടെടുപ്പില്‍ ജയിക്കാനുള്ള അംഗ സംഖ്യ നിലവിലുണ്ട്.
എന്നാല്‍ ഇത് തടയാനും 18 എം.എല്‍.എമാരെകൂടി പങ്കാളികളാക്കി സര്‍ക്കാര്‍ വിശ്വാസ വോട്ട് തേടണമെന്ന ആവശ്യമാണ് ദിനകരന്‍ മുന്നോട്ടുവയ്ക്കുന്നത്. 18 എം.എല്‍.എമാര്‍ അയോഗ്യരായതോടെ ജയലളിത അന്തരിച്ചതോടെ വന്ന ഒഴിവും ചേര്‍ത്ത് 19 സീറ്റുകളാണ് നിയമസഭയില്‍ ഒഴിവുണ്ടായിരിക്കുന്നതെന്നാണ് വിലയിരുത്തപ്പെടുന്നത്.