നെടുമ്പാശ്ശേരി: ഈ വര്‍ഷത്തെ ഹജ്ജ് കര്‍മ്മത്തില്‍ പങ്കെടുത്ത മുന്നൂറ് ഹാജിമാരുമായി സംസ്ഥാന ഹജ്ജ് കമ്മിറ്റിയുടെ നേതൃത്വത്തിലുള്ള ആദ്യ വിമാനം നെടുമ്പാശ്ശേരിയിലെത്തി. രാവിലെ 6.36നാണ് എസ് വി 5346 നമ്പര്‍ സഊദി എയര്‍ലൈന്‍സ് വിമാനം എത്തിയത്. മദീന വിമാനത്താവളത്തില്‍ നിന്നാണ് ഹാജിമാരുടെ മടക്കയാത്ര.

നെടുമ്പാശ്ശേരി അന്താരാഷ്ട്ര വിമാനത്താവളത്തിലെ ടി 3 ടെര്‍മിനലിലാണ് ഹാജിമാര്‍ മടങ്ങിയെത്തുന്നത്. ഹാജിമാരുടെ സഹായത്തിനായി ടെര്‍മിനലിനകത്ത് ഹജ്ജ് കമ്മിറ്റിയുടെ നേതൃത്വത്തില്‍ പ്രത്യേക വളണ്ടിയര്‍മാരെയും നിയോഗിച്ചിട്ടുണ്ട്.

ആദ്യ വിമാനത്തിലെ ഹാജിമാരെ സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവിയുടെ നേതൃത്വത്തില്‍ വിമാനത്താവളത്തില്‍ സ്വീകരിച്ചു.ആഗസ്റ്റ് 13 ന് നെടുമ്പാശ്ശേരിയില്‍ നിന്നും യാത്ര തിരിച്ച ആദ്യ സംഘം ഹാജിമാരാണ് ഇന്ന് മടങ്ങിയെത്തിയത്. എട്ട് മണിയോടെ ഹാജിമാര്‍ വിമാനത്താവളത്തിന് പുറത്തെത്തും.ഹജ്ജ് കമ്മിറ്റിയുടെ നേതൃത്വത്തില്‍ ടി 3 ടെര്‍മിനലിന് പുറത്ത് ഹെല്‍പ് ഡെസ്‌ക് പ്രവര്‍ത്തിക്കുന്നുണ്ട്.