തളിപ്പറമ്പ്: കീഴാറ്റൂര്‍ സമരം സര്‍ക്കാര്‍ ഗൗരവത്തിലെടുക്കണമെന്ന് കിസാന്‍ ചെയര്‍മാന്‍ ടി.ഒ മോഹനന്‍. വയല്‍ നികത്തി ബൈപാസ് നിര്‍മിക്കുന്നതിനെതിരായി കീഴാറ്റൂരില്‍ സമരം നടത്തുന്ന വയല്‍ക്കിളികള്‍ക്ക് ഐക്യദാര്‍ഢ്യവുമായി എത്തിയതായിരുന്നു അദ്ദേഹം. ഇന്നലെ വൈകുന്നേരം ആറോടെയാണ് കാര്‍ഷിക പാരിസ്ഥിതിക മേഖലയില്‍ പ്രവര്‍ത്തിക്കുന്ന കിസാന്‍ പ്രവര്‍ത്തകര്‍ കീഴാറ്റൂരില്‍ എത്തിയത്. പരിസ്ഥിതി സംരക്ഷണത്തെക്കുറിച്ച് ആളുകള്‍ സംസാരിക്കുന്നത് തന്നെ കുറഞ്ഞുവരുന്ന കാലഘട്ടത്തില്‍ പാരിസ്ഥിതിക ആഘാതങ്ങളെക്കുറിച്ച് വിശദമായി ജനങ്ങളുടെ മുന്നില്‍ അവതരിപ്പിച്ചുകൊണ്ടുളള സമരമാണ് കീഴാറ്റൂരില്‍ നടക്കുന്നതെന്നും ടി.ഒ മോഹനന്‍ പറഞ്ഞു. എം. രത്‌നകുമാര്‍, രാജേഷ്, പി.ടി ഗിരിജ, പി. നാരായണന്‍, പാറയില്‍ രാജന്‍ എന്നിവരും ഉണ്ടായിരുന്നു. സമര നേതാവ് സുരേഷ് കീഴാറ്റൂരിന്റെ നിരാഹാരം പതിനൊന്നു ദിവസം പിന്നിട്ട സാഹചര്യത്തില്‍ സമരം നഗരത്തിലേക്ക് വ്യാപിപ്പിക്കാനാണ് പ്രവര്‍ത്തകരുടെ തീരുമാനം. സമരത്തിന് ഐക്യദാര്‍ഢ്യം പ്രകടിപ്പിച്ച് ജില്ലയിലെ പരിസ്ഥിതി, പൗരാവകാശ, പ്രതിരോധ പ്രവര്‍ത്തകര്‍ ഇന്ന് ഉച്ചയ്ക്ക് 2.30ന് തളിപ്പറമ്പ് മൂത്തേടത്ത് ഹൈസ്‌കൂളില്‍ ഐക്യദാര്‍ഢ്യ സമിതി രൂപീകരണ യോഗം ചേരും. ജില്ലയിലെ പരിസ്ഥിതി പ്രവര്‍ത്തകരോടൊപ്പം സമരത്തെ പിന്തുണക്കുന്ന മുഴുവനാളുകളും. സമരത്തിന്റെ ഭാഗമായി വയല്‍ക്കിളി പ്രവര്‍ത്തകര്‍ തളിപ്പറമ്പ് നഗരത്തില്‍ ബൈക്ക് റാലി സംഘടിപ്പിച്ചു.