മെക്‌സിക്കോ സിറ്റി: മെക്‌സിക്കന്‍ തലസ്ഥാനമായി മെക്‌സിക്കോ സിറ്റിയിലും തൊട്ടടുത്ത ടൗണുകളിലുമായി കഴിഞ്ഞ ദിവസമുണ്ടായ ഭൂചലനത്തില്‍ പരുക്കേറ്റ് കെട്ടിടങ്ങള്‍ക്കടിയില്‍ കുടുങ്ങിയവര്‍ക്കായുള്ള തിരച്ചില്‍ തുടരുന്നു. ഇതിനിടെ തകര്‍ന്നുവീണ സ്‌കൂള്‍ കെട്ടിടത്തിനടിയില്‍നിന്നു കൂടുതല്‍ കുട്ടികളെ പുറത്തെടുത്തത് ഇനിയും കുട്ടികള്‍ കുടുങ്ങിക്കിടക്കുന്നുണ്ടെന്ന സംശയത്തിനിടയാക്കിയിട്ടുണ്ട്.
കഴിഞ്ഞ ദിവസമാണ് മെക്‌സിക്കോയില്‍ റിക്ടര്‍ സ്‌കെയിലില്‍ 7.1 തീവ്രത രേഖപ്പെടുത്തിയ ഭൂചലനമുണ്ടായത്. ഉച്ചയോടെയുണ്ടായ ഭൂചലനത്തില്‍ സ്‌കൂളുകളും ഓഫിസുകളും അടക്കമുള്ള ഒട്ടേറെ കെട്ടിടങ്ങള്‍ തകര്‍ന്നുവീണിരുന്നു. സംഭവത്തില്‍ 230 പേര്‍ കൊല്ലപ്പെട്ടതായാണ് ഇതുവരെ സ്ഥിരീകരിച്ചിരിക്കുന്നത്.
അതേസമയം, തകര്‍ന്നുവീണ കെട്ടിടാവശിഷ്ടങ്ങള്‍ക്കിടയില്‍ ഒരു പന്ത്രണ്ടുവയസുകാരി കുടുങ്ങിക്കിടക്കുന്നതായി റിപ്പോര്‍ട്ടുണ്ട്. ഈ കുട്ടിയെ രക്ഷിക്കാനുള്ള ശ്രമങ്ങള്‍ തുടരുകയാണ്.
1985ല്‍ രാജ്യത്തുണ്ടായ വന്‍ ഭൂകമ്പത്തിന്റെ അനുസ്മരണ ദിനത്തിലായിരുന്നു വീണ്ടും ദുരന്തം സംഭവിച്ചത്. ഈ മാസം ആദ്യവും മെക്‌സിക്കോയില്‍ ഭൂകമ്പമുണ്ടായിരുന്നു. അന്നു 98 പേരാണ് കൊല്ലപ്പെട്ടിരുന്നത്.