ഇരിക്കൂര്‍: നഗരത്തിനടുത്ത് ന്യൂബീമ ഇലക്ട്രിക്കല്‍ ആന്റ് പ്ലംബിങ് ഷോപ്പിനു സമീപത്ത് പ്രവര്‍ത്തിക്കുന്ന കാനറബാങ്ക് ഇരിക്കൂര്‍ ബ്രാഞ്ചിന്റെ എ.ടി.എം കൗണ്ടര്‍ തകര്‍ത്ത് കവര്‍ച്ചാശ്രമം. എ.ടി.എമ്മിന്റെ മോണിറ്ററും പണം പുറത്തേക്കുവരുന്ന കൗണ്ടര്‍ഭാഗവും പൂര്‍ണമായും തകര്‍ത്ത ശേഷം പണം മോഷ്ടിക്കാനുള്ള ശ്രമം പരാജയപ്പെടുകയായിരുന്നു. ഇന്നലെ പുലര്‍ച്ചെ ഒന്നേമുക്കാല്‍ മുതല്‍ മൂന്നരവരെയുള്ള സമയത്താണ് മോഷണശ്രമം നടന്നതെന്ന് പൊലിസ് സംശയിക്കുന്നു. ഇരിക്കൂര്‍ എസ്.ഐ ഗോവിന്ദന്റെ നേതൃത്വത്തില്‍ നൈറ്റ് പട്രോളിന്റെ ഭാഗമായി പൊലിസെത്തിയ ശേഷമാണ് എ.ടി.എം കവര്‍ച്ചാശ്രമം അറിഞ്ഞത്. ഇന്നലെ പുലര്‍ച്ചെ മുഖംമൂടിധാരികളായ രണ്ടുപേര്‍ മെഷീര്‍ തകര്‍ക്കുന്ന ദൃശ്യങ്ങള്‍ എ.ടി.എമ്മിന്റെയും തൊട്ടടുത്ത മറ്റൊരു കടയിലെയും സി.സി.ടി.വിയിലും പതിഞ്ഞിട്ടുണ്ട്. പാന്റ്‌സും ഷര്‍ട്ടുമാണ് ഇവരുടെ വേഷം.
ലോക്കര്‍ തകര്‍ത്തെങ്കിലും പണമെടുക്കാനാവാതെ കവര്‍ച്ചാസംഘം ബൈക്കില്‍ കയറി രക്ഷപ്പെടുകയായിരുന്നു. ബാങ്ക് കെട്ടിടത്തില്‍ തന്നെ സംസ്ഥാനപാതയോരത്താണ് എ.ടി. എം കൗണ്ടര്‍ പ്രവര്‍ത്തിച്ചുവരുന്നത്. ബുള്ളറ്റിലെത്തിയ രണ്ടു യുവാക്കള്‍ നൂരിയ്യ പള്ളിക്കടുത്ത് നൂറുമീറ്റര്‍ അകലെ ബൈക്കില്‍ നിര്‍ത്തി വന്നാണ് എ.ടി.എമ്മില്‍ കടന്നത്. എ.ടി.എമ്മിന് കാവല്‍ക്കാരനില്ലാത്തത് ഇവര്‍ക്ക് സൗകര്യമായി.കണ്ണൂരില്‍ നിന്നും വിരലടയാള വിദഗ്ധരും ഡോഗ് സ്‌ക്വാഡും സ്ഥലത്തെത്തി പരിശോധന നടത്തി.