റിയാദ്: റോഹിംഗ്യന്‍ അഭയാര്‍ഥികള്‍ക്ക് സഊദിയുടെ സല്‍മാന്‍ രാജാവ് പ്രഖ്യാപിച്ച അടിയന്തര സഹായസാധനങ്ങളുമായി സഊദി സംഘം ബംഗ്ലാദേശിലെത്തി. സഹായങ്ങള്‍ വഹിച്ചുള്ള വിമാനം ബംഗ്ലാദേശിലെ ചിറ്റഗോങ്ങില്‍ എത്തിയതായി റോയല്‍ കോര്‍ട്ട് ഉപദേഷ്ടാവും കിങ് സല്‍മാന്‍ റിലീഫ് സെന്റര്‍ ജനറല്‍ സൂപ്പര്‍വൈസറുമായ ഡോ. അബ്ദുല്ല ബിന്‍ അബ്ദുല്‍ അസീസ് അല്‍ റബീഹാ പറഞ്ഞു.
ദുരിതത്തിലായ അഭയാര്‍ഥികള്‍ക്കു താല്‍ക്കാലിക ആശ്വാസമെന്ന നിലക്കാണ് ഇപ്പോള്‍ അടിയന്തര സഹായം എത്തിച്ചത്. നൂറ് ടണ്‍ ഭക്ഷ്യവസ്തുക്കളും താമസസൗകര്യത്തിനുള്ള വസ്തുക്കളുമാണ് ഉള്‍ക്കൊള്ളുന്നത്. തമ്പുകള്‍, ഭക്ഷ്യ കിറ്റുകള്‍, വിരിപ്പുകള്‍, പുതപ്പുകള്‍ തുടങ്ങിയ ആവശ്യവസ്തുക്കളാണ് എത്തിച്ചിരിക്കുന്നത്. ഇവര്‍ക്കൊപ്പം റിലീഫ് കേന്ദ്രത്തില്‍നിന്നുള്ള പ്രത്യേക സംഘവുമുണ്ട്. വരും ദിവസങ്ങളില്‍ സഊദിയുടെ സഹായവുമായി കൂടുതല്‍ വിമാനങ്ങള്‍ അയക്കുമെന്നും അദ്ദേഹം പറഞ്ഞു.