ചെന്നൈ: 57മത് ദേശീയ ഓപണ്‍ അത്‌ലറ്റിക്‌സ് ചാംപ്യന്‍ഷിപ്പിന് ഇന്ന് ചെന്നൈ ജവഹര്‍ലാല്‍ നെഹ്‌റു സ്റ്റേഡിയത്തില്‍ തുടക്കമാകും. വിവിധ സംസ്ഥാനങ്ങളില്‍ നിന്നായി 1200 അത്‌ലറ്റുകള്‍ നാല് ദിവസം നടക്കുന്ന പോരാട്ടങ്ങളില്‍ മാറ്റുരയ്ക്കും. ഇന്ന് മുതല്‍ ഈ മാസം 29 വരെയാണ് മത്സരങ്ങള്‍.
31 പുരുഷ താരങ്ങളും 29 വനിതാ താരങ്ങളുമായി 60 അംഗ സംഘമാണ് കേരളത്തിനായി പോരാടുന്നത്. സര്‍വിസസ്, റെയില്‍വേസ്, ഓള്‍ ഇന്ത്യ പൊലിസ് സ്‌പോര്‍ട്‌സ് ബോര്‍ഡ്, ഒ.എന്‍.ജി.സി, എല്‍.ഐ.സി ടീമുകള്‍ക്കായും മലയാളി താരങ്ങള്‍ മാറ്റുരയ്ക്കുന്നുണ്ട്.
ദിവസങ്ങള്‍ക്ക് മുന്‍പ് ഇന്‍ഡോര്‍ അത്‌ലറ്റിക്‌സ് പോരാട്ടത്തിലെ 1500 മീറ്ററില്‍ സ്വര്‍ണം നേടിയ പി.യു ചിത്ര ഓപണ്‍ അത്‌ലറ്റിക്‌സില്‍ പങ്കെടുക്കുന്നില്ല. വിശ്രമം ആവശ്യപ്പെട്ടാണ് താരം പിന്‍മാറിയത്.