കോഴിക്കോട്: ഇന്ത്യയില്‍ നിന്ന് ഈ വര്‍ഷം ഉംറക്ക് തീര്‍ഥാടനത്തിന് പുറപ്പെട്ട ആദ്യ സംഘമായ അല്‍ഹിന്ദ് ഉംറ സംഘം മക്കയിലെത്തി. അല്‍ഹിന്ദ് അമീറുമാരായ അബ്ദുല്‍ അസീസ് അഷറഫി നിലമ്പൂര്‍, സലിം ബാഖവി തുടങ്ങിയവരുടെ നേതൃത്വത്തിലുള്ള 252 അംഗ സംഘമാണ് ജിദ്ദ വിമാനത്താവളത്തിലെത്തിയത്.
ആദ്യസംഘത്തെ സഊദി ഹജ്ജ് ഉംറ മന്ത്രാലയ പ്രതിനിധി, സഊദി ഉംറ ഹാന്‍ഡലിങ് കമ്പനി മേധാവികള്‍, എയര്‍പോര്‍ട്ട് അതോറിറ്റി ഉദ്യോഗസ്ഥര്‍ കെ.എം.സി.സി ഉള്‍പ്പെടെ വിവിധ സംഘടനാ പ്രതിനിധികള്‍, അല്‍ഹിന്ദ് ടൂര്‍സ് ആന്‍ഡ് ട്രാവല്‍സ് പ്രതിനിധികള്‍ തുടങ്ങിയവര്‍ ജിദ്ദ എയര്‍പോര്‍ട്ടില്‍ സ്വീകരിച്ചു.
ആദ്യ സംഘത്തിനുള്ള യാത്രാരേഖകളുടെ വിതരണോദ്ഘാടനം പാണക്കാട് സയ്യിദ് ഹൈദരലി ശിഹാബ് തങ്ങള്‍ ആദ്യയാത്രക്കാരനായ അബ്ദുള്‍ റഹ്്മാന്‍ ആമയൂരിന് കൈമാറിക്കൊണ്ട് നിര്‍വഹിച്ചു.
മഞ്ചേരി ഫര്‍സ ഹോട്ടല്‍ ഓഡിറ്റോറിയത്തിലും കോഴിക്കോട് അല്‍ഹിന്ദ് ടവറിലും നടന്ന യാത്രയയപ്പ് ചടങ്ങുകളില്‍ മലപ്പുറം റീജ്യനല്‍ മാനേജര്‍ യാസിര്‍ മുണ്ടോടന്‍, മുഹമ്മദ് മുസ്്‌ലിയാര്‍, കുഞ്ഞാപ്പഹാജി അല്‍ഹിന്ദ് ഹജ്ജ് ഉംറ കോ-ഓഡിനേറ്റര്‍മാരായ ഷബീര്‍ ബാബു, ഹാശിം മൂഴിക്കല്‍, അബ്ദുസമദ് പി.ആര്‍, നജീബ് നടുത്തൊടി, മുഹമ്മദ് ഇര്‍ഫാന്‍ സംസാരിച്ചു.