പാലാ: വേങ്ങര ഉപതെരഞ്ഞെടുപ്പില്‍ കേരളാ കോണ്‍ഗ്രസ് (എം) പാര്‍ട്ടി മുസ്‌ലിം ലീഗിന് പന്തുണ നല്‍കുമെന്ന് പാര്‍ട്ടി ചെയര്‍മാന്‍ കെ.എം മാണി എം.എല്‍.എ പറഞ്ഞു. ലീഗിനുള്ള പിന്തുണ യു.ഡി.എഫിനുള്ള പിന്തുണയായി വ്യാഖ്യാനിക്കേണ്ടതില്ല.കഴിഞ്ഞ ഉപതെരഞ്ഞെടുപ്പില്‍ കേരള കോണ്‍ഗ്രസ് (എം) കുഞ്ഞാലിക്കുട്ടിയുടെ വിജയത്തിന് വേണ്ടിയാണ് പ്രവര്‍ത്തിച്ചത്. പാലായില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
ലീഗുമായുള്ള ദീര്‍ഘകാലത്തെ ആത്മബന്ധത്തിന്റെ അടിസ്ഥാനത്തിലാണിത്. പാണക്കാടുമായി നല്ല ബന്ധമാണുള്ളത്. ഈ പിന്തുണ ഏതെങ്കിലും മുന്നണിപ്രവേശനത്തിന്റെ ഒരുക്കമായോ പാലമായോ വ്യാഖ്യാനിക്കേണ്ടതില്ല. കേരളാ കോണ്‍ഗ്രസ് ഇപ്പോള്‍ യു.ഡി.എഫിന്റെ ഭാഗമല്ല. അതിന് സ്വതന്ത്രമായ നിലപാടുണ്ട്.
കോണ്‍ഗ്രസ് (എം) ഏതെങ്കിലും മുന്നണിയിലേക്ക് പ്രവേശനത്തിനായി കാത്തിരിക്കുന്നില്ല. മുന്നണിപ്രവേശം സംബന്ധിച്ച് ഡിസംബറില്‍ നടക്കുന്ന സംസ്ഥാന സമ്മേളനത്തില്‍ കൂടുതല്‍ വ്യക്തത കൈവരും. ഏതെങ്കിലും മുന്നണിയില്‍ പ്രവേശിക്കണമെന്നാവശ്യപ്പെട്ട് കേരളാ കോണ്‍ഗ്രസ് അപേക്ഷ നല്‍കിയിട്ടില്ല. ഇപ്പോള്‍ നടക്കുന്ന ചര്‍ച്ചകള്‍ ഞങ്ങളെ അപഹാസ്യരാക്കാനാണെന്നും കെ.എം മാണി പറഞ്ഞു.