ബംഗളൂരു: പ്രമുഖ മാധ്യമപ്രവര്‍ത്തക ഗൗരി ലങ്കേഷിന്റെ കൊലപാതകത്തില്‍ ഗോവ ആസ്ഥാനമായുള്ള തീവ്രഹിന്ദുത്വ സംഘടന സനാതന്‍ സന്‍സ്ത സംശയത്തിന്റ നിഴലില്‍. സനാതന്‍ സന്‍സ്തയുടെ അഞ്ചു പ്രവര്‍ത്തകര്‍ക്ക് ഗൗരിയുടെ വധത്തില്‍ പങ്കുണ്ടെന്ന് അന്വേഷണ സംഘം വ്യക്തമാക്കി. ഇവര്‍ പ്രശസ്ത യുക്തിവാദി നരേന്ദ്ര ദാബോല്‍ക്കര്‍, ഗോവിന്ദ് പന്‍സാരെ, എം.എം കല്‍ബുര്‍ഗി എന്നിവരുടെ വധത്തില്‍ സംശയത്തിന്റെ നിഴലിലുള്ളവരാണ്.
സംഗ്‌ലി സ്വദേശിയായ രുദ്രപാട്ടീല്‍, കോലാപൂര്‍ സ്വദേശിയായ പ്രവീണ്‍ ലിംകര്‍, മംഗളൂരു സ്വദേശിയായ ജയപ്രകാശ് എന്ന അന്ന, പൂനെ സ്വദേശി സാരംഗ് അകോല്‍ക്കര്‍, സതാര സ്വദേശി വിനയ് പവാര്‍ എന്നിവരെയാണ് പൊലിസ് കൊലപാതകവുമായി ബന്ധപ്പെട്ട് തിരഞ്ഞുകൊണ്ടിരിക്കുന്നത്. ഇതില്‍ പ്രവീണ്‍, ജയപ്രകാശ്, സാരംഗ്, രുദ്രപാട്ടീല്‍ എന്നിവര്‍ 2009ലെ മഡ്ഗാവ് സ്‌ഫോടനത്തില്‍ പ്രതികളാണ്. ഇവര്‍ ദേശീയ അന്വേഷണ ഏജന്‍സിയുടെ കൊടുംകുറ്റവാളികളുടെ പട്ടികയിലുണ്ട്. ഇന്റപോളും ഇവര്‍ക്ക് വേണ്ടി റെഡ് കോര്‍ണര്‍ നോട്ടിസ് പുറപ്പെടുവിച്ചിരുന്നു.
എന്നാല്‍ ഇത്രയധികം ഗുരുതരമായ കേസുകളുണ്ടായിട്ടും ഇവരെ പിടികൂടാന്‍ പൊലിസിന് സാധിച്ചിട്ടില്ല. മാര്‍ച്ചില്‍ സി.ബി.ഐ വിനയ് പവാറിനെയും സാരംഗ് അകോല്‍ക്കറിനെയും പിടികൂടുന്നതിനായി അഞ്ചു ലക്ഷം രൂപ പാരിതോഷികം പ്രഖ്യാപിച്ചിരുന്നു. ഇവര്‍ ദാബോല്‍ക്കര്‍ വധത്തില്‍ അറസ്റ്റിലായ വീരേന്ദ്ര താവ്‌ഡെയുമായി അടുത്ത ബന്ധം പുലര്‍ത്തുന്നവരാണെന്ന് സി.ബി.ഐ വ്യക്തമാക്കിയിട്ടുണ്ട്. മഡ്ഗാവ് സ്‌ഫോടനത്തിന് ശേഷം സാരംഗ് ഒളിവിലാണ്. വിനയ് പവാര്‍ ഈ കൊലപാതകങ്ങളുടെയെല്ലാം ആസൂത്രകനാണെന്ന് സി.ബി.ഐ പറഞ്ഞു. നേരത്തെ ഇവര്‍ ഇ -മെയിലിലൂടെയാണ് ദാബോല്‍ക്കറെ വധിക്കാനുള്ള പദ്ധതികള്‍ തീരുമാനിച്ചത്.
കല്‍ബുര്‍ഗി വധത്തില്‍ രുദ്രപാട്ടീല്‍ പ്രധാന പ്രതിയാണെന്ന് കര്‍ണാടക സി.ഐ.ഡി പറഞ്ഞു. ഇയാള്‍ സനാതന്‍ സന്‍സ്തയുടെ വളണ്ടിയറാണ്. നേരത്തെ ഇവരെ പിടികൂടാന്‍ നടത്തിയ ശ്രമങ്ങളെല്ലാം പരാജയപ്പെട്ടിരുന്നു. ഇവരെല്ലാം നേപ്പാളിലേക്ക് കടന്നതായി സംശയിക്കുന്നുവെന്ന് എന്‍.ഐ.എ പറഞ്ഞു.
കല്‍ബുര്‍ഗി വധത്തിന് ഉപയോഗിച്ച അതേരീതിയിലുള്ള ബുള്ളറ്റുകളാണ് ഗൗരി വധത്തിനും ഉപയോഗിച്ചതെന്ന് കര്‍ണാടക പൊലിസ് സൂചിപ്പിച്ചു. ഒരേ തോക്കായിരിക്കണം കൃത്യത്തിന് ഉപയോഗിച്ചതെന്നും പൊലിസ് സംശയിക്കുന്നുണ്ട്. ഇക്കാരണത്താല്‍ കൊല നടത്തിയത് ഒരേ ആളുകള്‍ തന്നെയാണെന്ന് ഉറപ്പിക്കുന്നതായി പൊലിസ് പറഞ്ഞു.