കൊച്ചി: ലോകകപ്പിലെ കൊച്ചിയില്‍ നടന്ന ആദ്യ മത്സരത്തില്‍ കരിഞ്ചന്തയില്‍ വന്‍ വിലക്ക് ടിക്കറ്റുകള്‍ വില്‍ക്കാന്‍ ശ്രമിച്ച 16 പേരെ കൊച്ചി സിറ്റി ഷാഡോ പൊലിസ് പിടികൂടി. ഓണ്‍ലൈന്‍ ടിക്കറ്റ് വന്‍ തോതില്‍ റിസര്‍വ് ചെയ്യ്ത് ടിക്കറ്റ് ലഭ്യത കുറവ് മുതലെടുത്ത് വന്‍ വിലയ്ക്ക് വില്‍പന നടത്തിയ ഇരുന്നൂറോളം ടിക്കറ്റുകളും പിടികൂടി. ലോകകപ്പിന്റെ സുരക്ഷാ ക്രമീകരണങ്ങളോടനുബന്ധിച്ച് സിറ്റി പൊലിസ് കമ്മിഷണര്‍ എം.പി ദിനേശിന്റെയും ഡപ്യൂട്ടി കമ്മിഷണര്‍ കറുപ്പ് സ്വാമിയുടേയും നിര്‍ദ്ദേശാനുസരണം സ്റ്റേഡിയവും പരിസരവും ആറ് ഭാഗങ്ങളായി തിരിച്ച് ഷാഡോ സംഘങ്ങളെ വിന്യസിച്ച് നടത്തിയ പരിശോധനകളില്‍ ആണ് കരിഞ്ചന്ത വില്‍പനക്കാര്‍ പിടിയിലായത്.
പിടിയിലായ കാസര്‍കോട് സ്വദേശി സിദ്ദിഖ് (37) വന്‍ തോതില്‍ ടിക്കറ്റുകള്‍ ഓണ്‍ ലൈന്‍ റിസര്‍വേഷന്‍ നടത്തി കരസ്ഥമാക്കി തന്റെ കീഴിലുള്ള നാലോളം സംഘാംഗങ്ങള്‍ മുഖേനയാണ് വില്‍പന നടത്തിയത്. ഇവരില്‍ നിന്ന് മാത്രം അന്‍പതോളം ടിക്കറ്റുകള്‍ കണ്ടെടുത്തു.
ബ്രസീലും സ്‌പെയിനും ഏറ്റുമുട്ടിയ ആദ്യ മത്സരത്തിലെ വന്‍ തിരക്ക് മുതലെടുത്ത് മുന്നൂറ് രൂപയുടെ ടിക്കറ്റ് രണ്ടായിരത്തി അഞ്ഞൂറ് രൂപയ്ക്കായിരുന്നു ഈ സംഘം വില്‍പന നടത്തിയത്. പിടിയിലായ പതിനാറ് പേരെ ടിക്കറ്റ് ഉള്‍പ്പെടെ പാലാരിവട്ടം പൊലിസിന് കൈമാറി. ക്രൈം ഡിറ്റാച്ച്‌മെന്റ് എ.സി.പി ബിജി ജോര്‍ജിന്റെ നേതൃത്വത്തില്‍ ഷാഡോ എസ്.ഐ ഹണി കെ ദാസും ഇരുപതോളം പൊലിസുകാരും ചേര്‍ന്നാണ് പരിശോധന നടത്തിയത്.