മുംബൈ: വിഖ്യാത ബോളിവുഡ് സംവിധായകന്‍ കുന്ദന്‍ ഷാ അന്തരിച്ചു. ജാനേ ഭി ദോ യാരോണ്‍, കബി ഹാന്‍ കബി നാ തുടങ്ങിയ ചിത്രങ്ങള്‍ സംവിധാനം ചെയ്ത അദ്ദേഹം ഹൃദയാഘാതത്തെ തുടര്‍ന്ന് ഇന്നലെ രാവിലെയാണ് മരിച്ചത്. 69 വയസ് പ്രായമുണ്ടായിരുന്നു.
സിനിമക്കുപുറമെ ടി.വി സീരിയലുകളും അദ്ദേഹം സംവിധാനം ചെയ്തിട്ടുണ്ട്. ദൂരദര്‍ശനില്‍ പ്രക്ഷേപണം ചെയ്ത ഹാസ്യ സീരിയലായ യേജോ ഹായ് സിന്ദഗി സംവിധാനം ചെയ്തിട്ടുണ്ട്. പൂനെ ഫിലിം ഇന്‍സിറ്റിറ്റിയൂട്ടില്‍ നിന്ന് സംവിധാനത്തില്‍ ബിരുദം കരസ്ഥമാക്കിയ അദ്ദേഹത്തിന് ആദ്യ സിനിമയായ ജാനേ ഭി ദോ യാരോ എന്ന ചിത്രത്തിലൂടെ ദേശീയ അവാര്‍ഡ് ലഭിച്ചു. 2015ല്‍ പൂനെ ഫിലിം ഇന്‍സ്റ്റിറ്റ്യൂട്ടില്‍ വിദ്യാര്‍ഥികള്‍ നടത്തിയ സമരത്തിന് പിന്തുണ പ്രഖ്യാപിച്ച് തനിക്ക് ലഭിച്ച അവാര്‍ഡ് സര്‍ക്കാരിന് തിരിച്ചുനല്‍കിയും അദ്ദേഹം പ്രതിഷേധിച്ചിരുന്നു. പ്രമുഖ കാര്‍ട്ടൂണിസ്റ്റ് ആര്‍.കെ ലക്ഷ്മണന്റെ ജീവിതത്തെക്കുറിച്ച് തയാറാക്കിയ വാഗ്‌ലെ കി ദുനിയ ഏറെ ശ്രദ്ധപിടിച്ചുപറ്റിയ ഡോക്യുമെന്ററിയായിരുന്നു.