തിരുവനന്തപുരം: രഞ്ജി ട്രോഫിയുടെ പുതിയ സീസണില്‍ കേരളത്തിന് വിജയത്തുടക്കം. തിരുവനന്തപുരം ഗ്രീന്‍ഫീല്‍ഡ് സ്റ്റേഡിയത്തില്‍ നടന്ന ആദ്യ മത്സരത്തില്‍ ജാര്‍ഖണ്ഡിനെ ഒന്‍പത് വിക്കറ്റിനാണ് കേരളം തോല്‍പിച്ചത്. ഡേവ് വാട്‌മോറിന് കീഴില്‍ രഞ്ജി ട്രോഫിക്കിറങ്ങിയ കേരളത്തിന് തകര്‍പ്പന്‍ ജയമാണ് ഇതോടെ നേടാനായത്.
സ്‌കോര്‍: ജാര്‍ഖണ്ഡ് 202, 89. കേരളം 259, 34/1. രണ്ടാമിന്നിങ്ങസില്‍ വിജയ ലക്ഷ്യമായ 33 റണ്‍സ് ലക്ഷ്യമിട്ടിറങ്ങിയ കേരളം ഒരു വിക്കറ്റ് മാത്രം നഷ്ടത്തില്‍ ലക്ഷ്യം കണ്ടെത്തി.
33 റണ്‍സ് വിജയ ലക്ഷ്യവുമായി ബാറ്റിങിനിറങ്ങിയ കേരളത്തിന് ഒരു റണ്‍സെടുത്ത ജലജ് സക്‌സേനയുടെ വിക്കറ്റ് മാത്രമാണ് നഷ്ടമായത്. ഒന്നാമിന്നിങ്‌സില്‍ 202 റണ്‍സെടുത്ത ജാര്‍ഖണ്ഡ്, രണ്ടാമിന്നിങ്‌സില്‍ 89 റണ്‍സിന് പുറത്തായി.
നാല് ബാറ്റ്‌സ്മാന്‍മാര്‍ക്ക് മാത്രം രണ്ടക്കം കടക്കാനായപ്പോള്‍ പുറത്താകാതെ 26 റണ്‍സെടുത്ത സൗരഭ് തിവാരി ടോപ് സ്‌കോററായി. രണ്ടാം ഇന്നിങ്‌സിന്റെ ഒരു ഘട്ടത്തിലും തിരിച്ചുവരവിന്റെ സൂചനപോലും നല്‍കാന്‍ കഴിയാതെ പോയ ജാര്‍ഖണ്ഡ് പ്രതിരോധിക്കാന്‍ പോലും തയാറാകാതെ തോല്‍വിയിലേക്ക് വീണു.
ആദ്യ ഇന്നിങ്‌സില്‍ ആറ് വിക്കറ്റും രണ്ടാമിന്നിങ്ങ്‌സില്‍ അഞ്ച് വിക്കറ്റും നേടിയ ജലജ് സക്‌സേനയാണ് ജാര്‍ഖണ്ഡിനെ തകര്‍ത്തത്. മത്സരത്തില്‍ ഒരു അര്‍ധ സെഞ്ച്വറിയും നേടിയ സക്‌സേന തന്നെയാണ് കളിയിലെ കേമന്‍. വിജയം നേടിയതിലൂടെ കേരളത്തിന് ആറ് പോയിന്റ് ലഭിച്ചു.