ഗുവാഹത്തി: ഏകദിന പരമ്പര നേട്ടത്തിന് പിന്നാലെ ടി20 പരമ്പരയും സ്വന്തമാക്കുക ലക്ഷ്യമിട്ട് ഇന്ത്യ ഇന്ന് ആസ്‌ത്രേലിയക്കെതിരായ രണ്ടാം ടി20 പോരാട്ടത്തിനിറങ്ങും. ആദ്യ മത്സരത്തില്‍ മഴയെ തുടര്‍ന്ന് ഡക്ക്‌വര്‍ത്ത് ലൂയീസ് നിയമപ്രകാരമാണ് ഇന്ത്യ വിജയം സ്വന്തമാക്കിയത്. മൂന്ന് മത്സരങ്ങളടങ്ങിയ പരമ്പരയില്‍ ഇന്ന് വിജയിച്ചാല്‍ ഇന്ത്യക്ക് പരമ്പര കൈപ്പിടിയിലാക്കാം. ഇന്ത്യയില്‍ പര്യടനത്തിനെത്തി കാര്യമായ ഒരു ചലനവും സൃഷ്ടിക്കാന്‍ കഴിയാത്തതിന്റെ ക്ഷീണത്തില്‍ ഇറങ്ങുന്ന ഓസീസ് ഇന്ന് വിജയിച്ച് പരമ്പരയില്‍ ഒപ്പമെത്തുകയാണ് ലക്ഷ്യമിടുന്നത്. നായകന്‍ സ്റ്റീവന്‍ സ്മിത്ത് പരുക്കേറ്റ് നാട്ടിലേക്ക് മടങ്ങിയതിനാല്‍ ഓപണര്‍ ഡേവിഡ് വാര്‍ണറാണ് ടീമിനെ നയിക്കുന്നത്.
2012 സെപ്റ്റംബര്‍ 28ന് ആസ്‌ത്രേലിയക്കെതിരേ ടി20 മത്സരം തോറ്റ ശേഷം ഇന്ത്യ പിന്നീട് ഇതുവരെ ഓസീസിനോട് പരാജയപ്പെട്ടിട്ടില്ല. തുടര്‍ച്ചയായ ഏഴ് ടി20 വിജയങ്ങളുടെ പകിട്ടുമായാണ് ഇന്ത്യ ഇന്ന് പോരിനിറങ്ങുന്നത്.
ഇന്ത്യന്‍ സ്പിന്നര്‍മാരായ കുല്‍ദീപ് യാദവിനേയും യുസ്‌വേന്ദ്ര ചഹലിനേയും എങ്ങിനെ നേരിടുമെന്ന അങ്കലാപ്പ് ഇതുവരെ അവസാനിക്കാതെയാണ് ഓസീസ് നില്‍ക്കുന്നത്. അഞ്ച് ഏകദിനങ്ങളും ഒരു ടി20 മത്സരവും അവസാനിച്ചപ്പോള്‍ 16 ഓസീസ് വിക്കറ്റുകളാണ് ഇരുവരും ചേര്‍ന്ന് പങ്കിട്ടത്.