കൊല്‍ക്കത്ത: തുടര്‍ച്ചയായ രണ്ടാം ജയത്തോടെ ഇ, എഫ് ഗ്രൂപ്പുകളില്‍ നിന്ന് കരുത്തരായ ഫ്രാന്‍സും ഇംഗ്ലണ്ടും പ്രീ ക്വാര്‍ട്ടറിലേക്ക് മുന്നേറി. ഈ ഗ്രൂപ്പുകളിലെ മറ്റ് മത്സരങ്ങളില്‍ ഹോണ്ടുറാസ്, ഇറാഖ് ടീമുകളും വിജയം കണ്ടു.
ഫ്രാന്‍സ് 2-1ന് ജപ്പാനെ വീഴ്ത്തിയപ്പോള്‍ മുന്‍ ചാംപ്യന്‍മാരായ മെക്‌സിക്കോയെ കടുത്ത പോരാട്ടത്തില്‍ 3-2ന് വീഴ്ത്തിയാണ് ഇംഗ്ലണ്ടിന്റെ മുന്നേറ്റം. ദുര്‍ബലരില്‍ ശക്തര്‍ തങ്ങളാണെന്ന് ഹോണ്ടുറാസ് തെളിയിച്ചപ്പോള്‍ ആദ്യമായി ലോകകപ്പിനെത്തിയ ന്യൂ കാലിഡോണിയക്ക് വീണ്ടും കനത്ത ഗോള്‍ വര്‍ഷം സഹിക്കേണ്ടി വന്നു. ഹോണ്ടുറാസ് കാലിഡോണിയന്‍ വലയില്‍ നിക്ഷേപിച്ചത് അഞ്ച് ഗോളുകള്‍. ആദ്യ മത്സരം പരാജയപ്പെട്ട ഹോണ്ടുറാസ് ജയത്തോടെ അടുത്ത ഘട്ടത്തിലേക്കുള്ള സാധ്യത നിലനിര്‍ത്തി. ലാറ്റിനമേരിക്കന്‍ കരുത്തരായ ചിലിയെ 3-0ത്തിനാണ് ഇറാഖ് വീഴ്ത്തിയത്. ആദ്യ മത്സരത്തില്‍ മെക്‌സിക്കോയുമായി സമനില വഴങ്ങിയ ഇറാഖിന് രണ്ടാം മത്സരത്തിലെ വിജയം അടുത്ത ഘട്ടത്തിലേക്കുള്ള സാധ്യതകള്‍ക്ക് വഴി തുറക്കുന്നതായി മാറി.
ആദ്യ മത്സരത്തില്‍ ഹോണ്ടുറാസിനെ ആറ് ഗോളുകള്‍ക്ക് കീഴടക്കിയതിന്റെ ആത്മവിശ്വാസത്തില്‍ ഇറങ്ങിയ ജപ്പാന്‍ ആ പ്രകടനം ഫ്രാന്‍സിനെതിരേ പുറത്തെടുക്കാന്‍ സാധിച്ചില്ല. അമിനെ ഗൗയിരി ഇരു പകുതികളിലായി നേടിയ ഇരട്ട ഗോളുകളാണ് ഫ്രാന്‍സിന് വിജയമുറപ്പിച്ചത്. കളിയുടെ 13, 71 മിനുട്ടുകളിലാണ് ഫ്രാന്‍സിന്റെ ഗോളുകള്‍ പിറന്നത്. 73ാം മിനുട്ടില്‍ ലഭിച്ച പെനാല്‍റ്റി മിയാഷിരോ വലയിലാക്കിയെങ്കിലും ഫ്രാന്‍സിന്റെ ജയം നിഷേധിക്കാന്‍ ജപ്പാന് സാധിച്ചില്ല.
മൂന്ന് ഗോളുകള്‍ക്ക് പിന്നില്‍ നിന്ന ശേഷം രണ്ട് ഗോള്‍ തിരിച്ചടിച്ച് തിരിച്ചുവരവിന്റെ സൂചനകള്‍ നല്‍കാന്‍ മുന്‍ ചാംപ്യന്‍മാരായ മെക്‌സിക്കോക്ക് സാധിച്ചെങ്കിലും ഇംഗ്ലണ്ടിന്റെ അനിവാര്യ വിജയം തടയാന്‍ അവര്‍ക്കായില്ല. കളിയുടെ 39ാം മിനുട്ടില്‍ ബ്രസ്റ്റര്‍, 48ാം മിനുട്ടില്‍ ഫൊഡെന്‍, 55ാം മിനുട്ടില്‍ സാഞ്ചോ എന്നിവര്‍ ഇംഗ്ലണ്ടിനായി ഗോള്‍ നേടി. 65, 72 മിനുട്ടുകളില്‍ ലൈനെസ് മെക്‌സിക്കോക്കായി വല കുലുക്കിയെങ്കിലും വിജയിക്കാന്‍ സാധിക്കാതെ പോയി. ആദ്യ മത്സരത്തില്‍ ഇറാഖുമായി തുല്ല്യത പാലിച്ച മെക്‌സിക്കോയ്ക്ക് ഇനിയും സാധ്യതകള്‍ നിലനില്‍ക്കുന്നു.
ആദ്യ പകുതിയില്‍ മൂന്നും രണ്ടാം പകുതിയില്‍ രണ്ടും ഗോളുകള്‍ വലയിലാക്കിയാണ് ന്യൂ കാലിഡോണിയക്കെതിരേ ഹോണ്ടുറാസിന്റെ അഞ്ച് ഗോള്‍ വിജയം. മെജിയ, പലാസിയോ എന്നിവര്‍ ഇരട്ട ഗോളുകള്‍ നേടിയപ്പോള്‍ ശേഷിച്ച ഗോള്‍ കനാലെസ് വലയിലാക്കി. ആദ്യ മത്സരത്തില്‍ ഫ്രാന്‍സ് ഏഴ് ഗോളുകളാണ് കാലിഡോണിയന്‍ വലയില്‍ നിക്ഷേപിച്ചത്. ഹോണ്ടുറാസ് അഞ്ചെണ്ണം വലയിലാക്കിയതോടെ രണ്ട് മത്സരങ്ങളില്‍ നിന്ന് അവര്‍ക്ക് വഴങ്ങേണ്ടി വന്നത് 12 ഗോളുകള്‍.
മുഹമ്മദ് ദാവൂദ് ഇരു പകുതികളിലായി നേടിയ ഇരട്ട ഗോളുകളും കളിയുടെ അവസാന ഘട്ടത്തില്‍ വലന്‍സിയ സമ്മാനിച്ച സെല്‍ഫ് ഗോളുമാണ് ചിലിക്കെതിരേ ഇറാഖിന് 3-0ത്തിന്റെ വിജയമൊരുക്കിയത്. ജയത്തോടെ ഇറാഖ് പ്രീ ക്വാര്‍ട്ടര്‍ സാധ്യത സജീവമാക്കി നിര്‍ത്തിയാണ് മൈതാനം വിട്ടത്.