ആയഞ്ചേരി (കോഴിക്കോട്): സ്‌കൂള്‍ ഉച്ചഭക്ഷണ വിതരണം കാര്യക്ഷമമാക്കാന്‍ സര്‍ക്കാര്‍ നീക്കംതുടങ്ങി. കഴിഞ്ഞ ദിവസം പൊതുവിദ്യാഭ്യാസ സെക്രട്ടറിയുടെ ചേമ്പറില്‍ ചേര്‍ന്ന യോഗത്തിലാണ് ഇതുസംബന്ധിച്ച തീരുമാനമുണ്ടായത്.
പാചക തൊഴിലാളികളുടെ വിരമിക്കല്‍ പ്രായം 60 ആക്കാന്‍ യോഗത്തില്‍ ധാരണയായിട്ടുണ്ട്. അടുത്തവര്‍ഷം മുതലാണ് ഇത് പ്രാബല്യത്തില്‍വരിക.
250 കുട്ടികള്‍ക്ക് ഒരു പാചക തൊഴിലാളി എന്ന രീതിയില്‍ ഇവരുടെ എണ്ണം ക്രമീകരിക്കും. 100 കുട്ടികള്‍ വരെയുള്ളയിടങ്ങളില്‍ ഉച്ചഭക്ഷണത്തിനുള്ള കണ്ടിജന്‍സി തുക ഒരുരൂപ വര്‍ധിപ്പിച്ച ഒന്‍പത് രൂപയാക്കും. കൂടാതെ ഒരു കുട്ടിക്ക് ദിനംപ്രതി രണ്ടു രൂപ നിരക്കില്‍ പച്ചക്കറി ലഭ്യമാക്കാന്‍ കുടുംബശ്രീയെ ചുമതലപ്പെടുത്തും. നവംമ്പര്‍ ഒന്നു മുതല്‍ പാചകത്തിന് ഗ്യാസ് മാത്രമേ ഉപയോഗിക്കാന്‍ പാടുള്ളൂ.
പാചകപ്പുര നവീകരണത്തിന്റെ വിശദാംശങ്ങള്‍ നിശ്ചിത തിയതിക്കുള്ളില്‍ ബന്ധപ്പെട്ട നൂണ്‍ മീല്‍സ് ഓഫിസര്‍മാര്‍ക്ക് പ്രധാനാധ്യാപകര്‍ സമര്‍പ്പിക്കണം. ഉച്ചഭക്ഷണം കഴിച്ച കുട്ടികളുടെ കണക്കുകള്‍ ഇനിമുതല്‍ എല്ലാ ദിവസവും അപ്‌ലോഡ് ചെയ്യണം.