ശ്രീനഗര്‍: കശ്മിരിലെ നിരവധി ആക്രമണങ്ങളുടെ സൂത്രധാരനും സര്‍ക്കാര്‍ 10 ലക്ഷം രൂപ തലക്ക് ഇനാം പ്രഖ്യാപിക്കുകയും ചെയ്ത ലഷ്‌കറെ ത്വയ്ബ കമാന്‍ഡര്‍ വസിം ഷായെ സൈന്യം വധിച്ചു. ഇയാള്‍ക്കൊപ്പം ഹാഫിസ് നസീര്‍ അഹമ്മദ് മിര്‍ എന്ന ഭീകരനെയും കൊലപ്പെടുത്തിയിട്ടുണ്ട്.
ശനിയാഴ്ച പുലര്‍ച്ചെ ജമ്മുകശ്മിരിലെ പുല്‍വാമ ജില്ലയിലുണ്ടായ ഏറ്റുമുട്ടലിലാണ് വസിം ഷായെയും കൂട്ടാളിയെയും കൊലപ്പെടുത്തിയതെന്ന് സൈന്യം അറിയിച്ചു. പുല്‍വാമയിലെ ലിട്ടര്‍ ഗ്രാമത്തില്‍ ഭീകരര്‍ ഒളിച്ചിരിക്കുന്നുണ്ടെന്ന വിവരത്തെ തുടര്‍ന്ന് പൊലിസും സൈന്യവും സംയുക്തമായി നടത്തിയ തിരച്ചിലിലാണ് ഏറ്റുമുട്ടലുണ്ടായതെന്ന് പ്രതിരോധ മന്ത്രാലയ വക്താവ് കേണല്‍ രാജേഷ് കാലിയ പറഞ്ഞു.
ഇവരില്‍ നിന്ന് തോക്കുകളും മറ്റു സ്‌ഫോടക വസ്തുക്കളും കണ്ടെടുത്തു. ഷോപിയാന്‍ സ്വദേശിയാണ് വസിം ഷാ. 23കാരനായ വസിംഷാ, കോളജ് പഠനം പാതിവഴിയില്‍ ഉപേക്ഷിച്ച് 2014ലാണ് ഭീകര സംഘടനയില്‍ അംഗമായത്.
അതിനിടെ, ജമ്മുകശ്മിരിലെ നന്ദ്മാര്‍ഗിനടുത്ത കുല്‍ഗാമില്‍ ഭീകരരുമായുണ്ടായ ഏറ്റുമുട്ടലില്‍ ഒരു പൊലിസുകാരന്‍ വീരമൃത്യുവരിച്ചു. മറ്റൊരു പൊലിസുകാരന് പരുക്കേല്‍ക്കുകയും ചെയ്തു. പൊലിസ് വാഹനത്തിനുനേരെ ഭീകരര്‍ നടത്തിയ ആക്രമണത്തിലാണ് പൊലിസ് കോണ്‍സ്റ്റബിളായ ഖുര്‍ഷിദ് അഹമ്മദ് കൊല്ലപ്പെട്ടത്.