ലണ്ടന്‍: ഈ വര്‍ഷത്തെ മാന്‍ ബുക്കര്‍പ്രൈസ് പുരസ്‌കാരം അമേരിക്കന്‍ സാഹിത്യകാരന്‍ ജോര്‍ജ് സോന്‍ഡേഴ്‌സിന്. ലിങ്കണ്‍ ഇന്‍ ദ ബാര്‍ഡോ എന്ന നോവലാണ് അദ്ദേഹത്തെ പുരസ്‌കാരത്തിന് അര്‍ഹനാക്കിയത്. ബുക്കര്‍ പ്രൈസ് ലഭിക്കുന്ന രണ്ടാമത്തെ അമേരിക്കക്കാരനാണ് അദ്ദേഹം. യാഥാര്‍ഥ്യത്തോട് ചേര്‍ന്നുനില്‍ക്കുന്നതാണ് അദ്ദേഹത്തിന്റെ നോവലെന്ന് പുരസ്‌കാരസമിതി വിലയിരുത്തി.
ഈ വര്‍ഷം ഫെബ്രുവരിയിലാണ് ലിങ്കണ്‍ ഇന്‍ ദ ബാര്‍ഡോ പുറത്തിറങ്ങിയത്. മുന്‍ അമേരിക്കന്‍ പ്രസിഡന്റ് എബ്രഹാം ലിങ്കണിന്റെ മകന്റെ ജീവിതമാണ് നോവലിന്റെ ഇതിവൃത്തം. വരുംകാല ജീവിതത്തെ മാറ്റിയെഴുതാന്‍ പ്രാപ്തമായ മഹത്തായ അംഗീകാരമാണ് പുരസ്‌കാരമെന്ന് സോണ്‍ടേഴ്‌സ് പറഞ്ഞു.
അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ നയങ്ങളെ പേരുപറയാതെ വിമര്‍ശിച്ച സോന്‍ഡേഴ്‌സ് പുതിയ കാലത്തെക്കുറിച്ചുള്ള ആശങ്കകളും പങ്കുവച്ചു. അപരിചിതമായ കാലത്താണ് നമ്മള്‍ ജീവിക്കുന്നത്.
അമേരിക്കയില്‍ തനത് സംസ്‌കാരം സംരക്ഷിക്കുന്നതിനെ കുറിച്ച് നമ്മള്‍ ഇപ്പോള്‍ കേട്ടുകൊണ്ടിരിക്കുകയാണെന്നും അദ്ദേഹം പറഞ്ഞു.
20 വര്‍ഷത്തോളം മനസില്‍ കൊണ്ടു നടന്ന ശേഷമാണ് നോവല്‍ യാഥാര്‍ഥ്യമാക്കാന്‍ സാധിച്ചതെന്നും സോന്‍ഡേഴ്‌സ് കൂട്ടിച്ചേര്‍ത്തു.
ചെറു കഥയില്‍ മികവുപുലര്‍ത്തിയിരുന്ന സോന്‍ഡേഴ്‌സിന്റെ ആദ്യത്തെ നോവലാണ് ഇത്. ഒരു രാത്രിയില്‍ എബ്രഹാം ലിങ്കന്റെ മകന്‍ മരിക്കുന്നതും ശവകുടീരത്തിലേക്കുള്ള അദ്ദേഹത്തിന്റെ സന്ദര്‍ശനവുമായിരുന്നു നോവല്‍ കൈകാര്യം ചെയ്തത്.