കാക്കനാട് : പരസ്യ ബോര്‍ഡ് വീണു ഇരുചക്ര വാഹന യാത്രക്കാരന് പരുക്ക്. കലൂര്‍ തേവരുപറമ്പ് ഇക്ബാലിനാണ് പരുക്കേറ്റത്. കൈക്കും കാലിനും പരുരുക്കേറ്റ ഇയാളെ സ്വകാര്യ ആശുപത്രിയില്‍ പ്രവേശിപ്പിച്ചു.
തൃക്കാക്കര എന്‍.ജി.ഒ കോര്‍ട്ടേഴ്‌സിലെ എറണാകുളം ഭാഗത്തേക്ക് പോകുന്ന ബസ് സ്റ്റോപ്പില്‍ സ്ഥാപിച്ചിരിക്കുന്ന പരസ്യ ബോര്‍ഡാണ് ദേഹത്ത് വീണത്. ബോര്‍ഡിനും ബൈക്കിനും അടിയില്‍പെട്ട ഇദ്ദേഹത്തെ ഓട്ടോ തൊഴിലാളികളും മറ്റു യാത്രക്കാരും ചേര്‍ന്നാണ് രക്ഷപെടുത്തിയത്.
എന്‍.പി.ഒ.എലിനു സമീപം സ്വകാര്യ സുപ്പര്‍ മാര്‍ക്കറ്റിലെ ജീവനക്കാരനായ ഇക്ബാല്‍ ഇന്നലെ  ഉച്ചയ്ക്ക് 2.30നു സ്ഥാപനത്തിലെ ക്യാഷ് ബാങ്കില്‍ അടച്ച് മടങ്ങുന്നതിനിടയിലാണ് അപകടം.
സംഭവം നഗരസഭ ചെയര്‍പേഴ്‌സന്റെ  ശ്രദ്ധയില്‍പെടുത്തുകയും അനധികൃതമായ പരസ്യ ബോര്‍ഡുകള്‍ നീക്കം ചെയ്യാന്‍ നടപടി സ്വീകരിക്കുമെന്നും ചെയര്‍പേഴ്‌സണ്‍ പറഞ്ഞു.