പെരിയ(കാസര്‍കോട്): ബോര്‍വെല്‍ ലോറി മറിഞ്ഞ് തൊഴിലാളി മരിച്ചു.സംഭവത്തില്‍ ഏഴ് പേര്‍ക്ക് പരുക്കേറ്റു. അപകടത്തില്‍ ലോറിക്കടിയില്‍പെട്ടയാളെ രണ്ടു മണിക്കൂറോളം പരിശ്രമിച്ചാണ് പുറത്തെടുത്തത്. പെരിയ മൂന്നാംകടവ് പാതയിലെ ഇറക്കത്തിലാണ് ഇന്ന് വൈകുന്നേരം അപകടമുണ്ടായത്. ലോറി മറിഞ്ഞതോടെ ഒരാള്‍ ഇതിനടിയില്‍പെടുകയായിരുന്നു. വിവരമറിഞ്ഞ് കാഞ്ഞങ്ങാട് നിന്നുമെത്തിയ അഗ്‌നിരക്ഷാ ശമന സേനയും പൊലിസും പ്രദേശവാസികളും ചേര്‍ന്നാണ് രക്ഷാപ്രവര്‍ത്തനം നടത്തിയത്.

ലോറിക്കടിയില്‍പെട്ടയാളെ പുറത്തെടുക്കുമ്പോഴേക്കും ഇയാള്‍ മരിച്ചിരുന്നു. മൃതദേഹം കാസര്‍കോട് ജനറല്‍ ആശുപത്രി മോര്‍ച്ചറിയിലേക്ക് മാറ്റി. അന്യസംസ്ഥാന തൊഴിലാളിയാണ് മരിച്ചതെന്നാണ് വിവരം. ഇയാളെ സംബന്ധിച്ചുള്ള കൂടുതല്‍ വിവരങ്ങള്‍ അറിവായിട്ടില്ല.