ന്യൂയോര്‍ക്ക്: ലോകത്തെ ഏറ്റവും ശക്തമായ പാസ്‌പോര്‍ട്ട് സിംഗപ്പൂരിന്റേത്. ആദ്യമായാണ് ആഗോള റാങ്കിങ്ങില്‍ ഒരു ഏഷ്യന്‍ രാജ്യം മുന്നിലെത്തുന്നത്.75ാം സ്ഥാനം കരസ്ഥമാക്കിയ ഇന്ത്യ മൂന്നു സ്ഥാനം മുന്നിലെത്തിയിട്ടുണ്ട്. കഴിഞ്ഞ റാങ്കിങില്‍ 78ാം സ്ഥാനത്തായിരുന്നു ഇന്ത്യ. ആഗോള സാമ്പത്തിക ഉപദേശക സംരംഭമായ ആര്‍ട്ടോണ്‍ കാപ്പിറ്റല്‍ ആണ് റാങ്കിങ് തയാറാക്കിയത്. ഗ്ലോബല്‍ പാസ്‌പോര്‍ട്ട് പവര്‍ ബാങ്കിങ് 2017 പ്രകാരമായിരുന്നു പട്ടിക തയാറാക്കല്‍. വിവിധ രാജ്യങ്ങളുടെ പാസ്‌പോര്‍ട്ടുകള്‍ അതിര്‍ത്തി കടക്കുന്നതിന്റെ അടിസ്ഥാനത്തിലായിരുന്നു റാങ്കിങ് തയാറാക്കിയത്. സിംഗപ്പൂര്‍ പാസ്‌പോര്‍ട്ടുമായി വിസയില്ലാതെ 173 രാജ്യങ്ങള്‍ സന്ദര്‍ശിക്കാമെന്നതിനാലാണ് സിംഗപ്പൂര്‍ പട്ടികയില്‍ ഒന്നാമതെത്തിയത്. രണ്ടാം സ്ഥാനത്ത് ജര്‍മനിയാണ്. സ്വീഡനും ദക്ഷിണ കൊറിയയുമാണ് മൂന്നാം സ്ഥാനത്ത്. ഡെന്‍മാര്‍ക്ക്, ഫിന്‍ലന്‍ഡി, ഇറ്റലി, ഫ്രാന്‍സ്, സ്‌പെയിന്‍, നോര്‍വേ, ജപ്പാന്‍, യു.കെ എന്നിവ തൊട്ടുപിന്നിലുണ്ട്.