കൊച്ചി: നവംബര്‍ ഒന്നിന് പ്രഖ്യാപിച്ച കടയടപ്പ് സമരത്തില്‍ നിന്ന് പിന്നോട്ടില്ലെന്ന് കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റ് ടി നസിറുദ്ദീന്‍. എറണാകുളം ടൗണ്‍ഹാളില്‍ സംഘടിപ്പിച്ച സമരപ്രഖ്യാപന കണ്‍വന്‍ഷനില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. ഹോട്ടലുകളുള്‍പ്പെടെയുള്ള വ്യാപാരസ്ഥാപനങ്ങള്‍ അടച്ചിട്ടുകൊണ്ടായിരിക്കും സമരം നടത്തുക. ജി.എസ്.ടി മൂലം പ്രതിസന്ധിയിലായ വ്യാപാര മേഖലയിലെ പ്രശ്‌നങ്ങള്‍ പരിഹരിക്കാന്‍ സര്‍ക്കാര്‍ ഇടപെടാത്ത സാഹചര്യത്തിലാണ് സമരം നടത്താന്‍ നിര്‍ബന്ധിതരായതെന്ന് അദ്ദേഹം പറഞ്ഞു. പ്രൊഫ. കെ.വി തോമസ് എം.പി ഉദ്ഘാടനം ചെയ്തു. പി.എ.എം ഇബ്രാഹിം, ദേവസ്യ മേച്ചേരി, പെരിങ്ങാമല രാമചന്ദ്രന്‍, മാരിയില്‍ കൃഷ്ണന്‍ നായര്‍ എന്നിവര്‍ സംസാരിച്ചു.