തിരുവനന്തപുരം: രാജസ്ഥാനെതിരായ രഞ്ജി ട്രോഫി പോരാട്ടത്തില്‍ കേരളത്തിന് 131 റണ്‍സിന്റെ തകര്‍പ്പന്‍ ജയം. കേരളം മുന്നോട്ട് വച്ച 343 റണ്‍സ് വിജയ ലക്ഷ്യം പിന്തുടര്‍ന്ന രാജസ്ഥാന്റെ പോരാട്ടം 211 റണ്‍സില്‍ അവസാനിപ്പിച്ചാണ് കേരളം സീസണിലെ രണ്ടാം വിജയം സ്വന്തമാക്കിയത്. ജയത്തോടെ കേരളത്തിന് ആറ് പോയിന്റ് ലഭിച്ചു. കേരളം ഒന്നാം ഇന്നിങ്‌സില്‍ 335 റണ്‍സും രണ്ടാം ഇന്നിങ്‌സില്‍ നാല് വിക്കറ്റ് നഷ്ടത്തില്‍ 250 റണ്‍സില്‍ ഡിക്ലയറും ചെയ്തു. രാജസ്ഥാന്‍ ഒന്നാം ഇന്നിങ്‌സില്‍ 243 റണ്‍സും രണ്ടാം ഇന്നിങ്‌സില്‍ 211 റണ്‍സുമാണെടുത്തത്. അവസാന ദിനത്തില്‍ വിജയത്തിലേക്ക് ബാറ്റേന്തിയ രാജസ്ഥാന്‍ ബാറ്റിങ് നിരയെ അഞ്ച് വിക്കറ്റ് വീഴ്ത്തിയ സിജോമോന്‍ ജോസഫിന്റെ ബൗളിങാണ് തകര്‍ത്തത്. ജലജ് സക്‌സേന രണ്ട് വിക്കറ്റെടുത്തു. ബിഷ്ട് (70), ലോംറോര്‍ (53) എന്നിവര്‍ മാത്രമാണ് രാജസ്ഥാന്‍ നിരയില്‍ തിളങ്ങിയത്.
നേരത്തെ മൂന്നാം ദിനത്തില്‍ രണ്ട് വിക്കറ്റ് നഷ്ടത്തില്‍ 217 റണ്‍സെന്ന നിലയില്‍ കളി അവസാനിപ്പിച്ച കേരളം അവസാന ദിനത്തില്‍ 33 റണ്‍സ് കൂടി ചേര്‍ത്ത് നാല് വിക്കറ്റ് നഷ്ടത്തില്‍ 250 റണ്‍സില്‍ ഇന്നിങ്‌സ് ഡിക്ലയര്‍ ചെയ്യുകയായിരുന്നു. തലേദിവസം സെഞ്ച്വറിയുമായി കേരളത്തിന്റെ ഇന്നിങ്‌സിന് കരുത്തായ ജലജ് സക്‌സേന 105 റണ്‍സുമായി പുറത്താകാതെ നിന്നു.
ഓള്‍റൗണ്ട് മികവ് പുലര്‍ത്തിയ ജലജ് സക്‌സേനയുടെ മിന്നും ഫോമാണ് കേരളത്തിനെ വിജയത്തിലേക്ക് നയിച്ചത്.