പീരുമേട്: ഇറങ്ങും മുന്‍പ് ബസ് മുന്നോട്ടെടുത്തതിനെ തുടര്‍ന്ന് സ്വകാര്യ ബസില്‍ നിന്ന് വീണ് സ്‌കൂള്‍ വിദ്യാര്‍ഥിക്ക് പരുക്ക്. 9ാം ക്ലാസ് വിദ്യാര്‍ഥി അശ്വിനാണ് പരുക്കേറ്റത്. ഇന്നലെ വൈകീട്ട് 3.30ഓടെ മരുതുംമൂട് 36ാം മൈലിലെ ബസ് സ്‌റ്റോപ്പിലാണ് അപകടം. വിദ്യാര്‍ഥി ബസില്‍ നിന്ന് ഇറങ്ങുംമുന്‍പ് വാഹനം മുന്നോട്ട് എടുക്കുകയായിരുന്നു. റോഡില്‍ കുട്ടി വീണ് കിടന്നിട്ടും ബസ് നിര്‍ത്താതെ പോയി. സമീപത്തെ കടക്കാരനാണ് വിദ്യാര്‍ഥിയെ എഴുന്നേല്‍പ്പിച്ചത്.
കൈക്ക് പരുക്കേറ്റ അശ്വിനെ മുണ്ടക്കയത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ചങ്ങനാശേരി-കട്ടപ്പന റുട്ടില്‍ സര്‍വീസ് നടത്തുന്ന എയ്ഞ്ചല്‍ ബസാണ് അപകടത്തിനിടയാക്കിയത്. ഇതേ കമ്പനിയുടെ ബസ് മരുതുംമൂട് ബസ് സ്‌റ്റോപ്പില്‍ നിര്‍ത്താത്തതിനെ തുടര്‍ന്ന് ഞായറാഴ്ച്ച മരുംതുംമൂട്ടില്‍ നാട്ടുകാരുമായി തര്‍ക്കം ഉണ്ടായിരുന്നു. ബസ് ജീവനക്കാര്‍ക്കെതിരേ പൊലിസ്, മോട്ടോര്‍ വാഹന വകുപ്പ്, ചൈല്‍ഡ് ലൈന്‍ അധികൃതര്‍ എന്നിവര്‍ക്ക് കുട്ടിയുടെ പിതാവ് പരാതി നല്‍കി.