തൊടുപുഴ: സഹപാഠികളായ പെണ്‍കുട്ടികളെ അശ്ലീലം പറഞ്ഞത് ചോദ്യം ചെയ്ത വിദ്യാര്‍ത്ഥികളെ കത്തി കാട്ടി ഭീഷണിപ്പെടുത്തി കടയിലിട്ട് ക്രൂരമായി മര്‍ദിച്ച സംഭവത്തില്‍ രണ്ടു പേര്‍ കൂടി പൊലിസിന്റെ പിടിയിലായി.
ഇടവെട്ടി കുമ്മംങ്കല്ലില്‍ വീട്ടില്‍ റിയാസ് കരിം(27), കാഞ്ഞാര്‍ വള്ളാട്ടു വീട്ടില്‍ അബ്ദുള്‍കലാം(27) എന്നിവരാണ് പിടിയിലായത്.
കഴിഞ്ഞ 11 നായിരുന്നു കേസിനാസ്പദമായ സംഭവം. തൊടുപുഴ പ്രൈവറ്റ് ബസ് സ്റ്റാന്‍ഡിനു സമീപം വഴിയോരത്ത് പച്ചക്കറി വില്‍പ്പന നടത്തിയിരുന്ന പ്രതികള്‍ വിദ്യാര്‍ഥിനികളോട് അപമര്യാദയായി പെരുമാറിയത് ചോദ്യം ചെയ്യാനെത്തിയ സഹപാഠികളായ വിദ്യാര്‍ഥികളെ കടക്കുള്ളിലേക്ക് വലിച്ചിഴച്ച് നാലു പേര്‍ ചേര്‍ന്ന് ക്രൂരമായി മര്‍ദ്ദിക്കുകയായിരുന്നു. ഇന്നലെ പിടിയിലായ റിയാസിന്റെ ഉടമസ്ഥതയിലുള്ളതാണ് കട. പിടിയിലായ അബ്ദുള്‍കലാം ഇയാളുടെ ബന്ധുവാണ്. നേരത്തെ രണ്ട് പേര്‍ പൊലിസിന്റെ പിടിയിലായിരുന്നു. വണ്ണപ്പുറം വടക്കേച്ചിറ വീട്ടില്‍ ഫൈസല്‍(25), കാസര്‍ഗോഡ് തെങ്ങുംതോട്ടത്തില്‍ ഷിജോ(28) എന്നിവരാണ് നേരത്തെ പൊലിസിന്റെ പിടിയിലായത്.