തിരുവനന്തപുരം: വിജിലന്‍സ് കോടതി അന്വേഷണത്തിന് ഉത്തരവിട്ട സാഹചര്യത്തില്‍ മന്ത്രി തോമസ് ചാണ്ടിയെ അധികാരത്തില്‍ കടിച്ചുതൂങ്ങാന്‍ മുഖ്യമന്ത്രി അനുവദിക്കരുതെന്ന് കെ.പി.സി.സി. പ്രസിഡന്റ് എം.എം ഹസന്‍.
എങ്ങനെയെങ്കിലും മന്ത്രിയെ രക്ഷിക്കാനുള്ള മുഖ്യമന്ത്രിയുടെ അവസാന ശ്രമവും പാഴായിരിക്കുകയാണ്. സര്‍ക്കാര്‍ വാദങ്ങള്‍ വിജിലന്‍സ് കോടതി പൂര്‍ണമായും തള്ളിക്കളഞ്ഞു. അഴിമതിക്കെതിരേ പ്രസംഗിച്ച് അധികാരത്തില്‍ വന്ന സര്‍ക്കാരാണിത്.
പ്രകടനപത്രികയില്‍ ഇക്കാര്യങ്ങളൊക്കെ വ്യക്തമാക്കിയിട്ടുണ്ട്. ജനങ്ങള്‍ക്കു നല്‍കിയ വാഗ്ദാനം പാലിക്കാനുള്ള ഇച്ഛാശക്തിയാണ് മുഖ്യമന്ത്രി കാട്ടേണ്ടത്. പിണറായി വിജയന്റെ മുന്നില്‍ മുട്ടിടിച്ച് നില്‍ക്കുന്ന സി.പി.ഐയെ കാണുമ്പോള്‍ സഹതാപം തോന്നുന്നുവെന്നും ഇങ്ങനെ പോയാല്‍ മുഴുവന്‍ സി.പി.ഐക്കാരും തലയില്‍ മുണ്ടിടേണ്ടിവരുമെന്നും ഹസന്‍ പറഞ്ഞു.