ന്യൂഡല്‍ഹി: ജെല്ലിക്കെട്ടുമായി ബന്ധപ്പെട്ട് തമിഴ്‌നാട് സര്‍ക്കാരിന് സുപ്രിം കോടതി നോട്ടിസ്. ജെല്ലിക്കെട്ടുമായി ബന്ധപ്പെട്ട് തമിഴ്‌നാട് സര്‍ക്കാര്‍ നടപ്പാക്കിയ പുതിയ നിയമത്തെ ചോദ്യം ചെയ്ത് പീപ്പിള്‍ ഫോര്‍ എത്തിക്കല്‍ ട്രീറ്റ്‌മെന്റ് ഓഫ് ആനിമല്‍സ്- പേറ്റ സമര്‍പ്പിച്ച ഹരജിയിലാണ് സുപ്രിംകോടതി നടപടി.

ജെല്ലിക്കെട്ടുമായി ബന്ധപ്പെട്ട് സര്‍ക്കാര്‍ നാലാഴ്ചയ്ക്കുള്ളില്‍ വിശദീകരണം നല്‍കണമെന്ന് ആവശ്യപ്പെട്ടാണ് കോടതി നോട്ടിസ് അയച്ചിരിക്കുന്നത്. ചീഫ് ജസ്റ്റീസ് ദീപക് മിശ്ര അധ്യക്ഷനായ ബെഞ്ചിന്റേതാണ് ഉത്തരവ്.

ജെല്ലിക്കെട്ട് നിരോധനത്തിന് പിന്നാലെ തമിഴ്‌നാട്ടില്‍ വ്യാപക സംഘര്‍ഷമാണ് അരങ്ങേറിയത്. ഒരാഴ്ച്ചയിലധികം സമരം നീണ്ടുനിന്നു മൊത്തം ഇരുപതോളം കേസുകളാണ് രജിസ്റ്റര്‍ ചെയ്തത്. ഓര്‍ഡിനന്‍സിന് പിന്നാലെ തമിഴ്‌നാട് നിയമസഭ ജെല്ലിക്കെട്ട് നിയമവിധേയമാക്കി ബില്ല് പാസ്സാക്കിയതോടെയാണ് സമരം അവസാനിപ്പിച്ചത്.