ഗുഡ്ഗാവ്: റയാന്‍ ഇന്റര്‍നാഷണല്‍ സ്‌കൂളില്‍ രണ്ടാം ക്ലാസ് വിദ്യാര്‍ഥി കഴുത്തറുത്ത് കൊല്ലപ്പെട്ട സംഭവവുമായി ബന്ധപ്പെട്ട് പതിനൊന്നാം ക്ലാസ് വിദ്യാര്‍ഥി അറസ്റ്റില്‍. സോഹ്നയിലെ വീട്ടില്‍ വെച്ചാണ് വിദ്യാര്‍ഥിയെ സി.ബി.ഐ അറസ്റ്റ് ചെയ്തത്. കുട്ടിയെ കൊന്നത് ഈ വിദ്യാര്‍ഥിയാണെന്നാണ് അന്വേഷണ സംഘം പറയുന്നത്.

കഴിഞ്ഞ ദിവസം രാത്രിയാണ് അറസ്റ്റിനെ കുറിച്ച് അന്വേഷണ സംഘം തന്നെ അറിയിച്ചതെന്ന് വിദ്യാര്‍ഥിയുടെ പിതാവ് പറഞ്ഞു. ഒരു ദിവസം മുഴുവന്‍ സി.ബി.ഐ അവനെ ചോദ്യം ചെയ്തു. പിന്നീട് കൊലപാതകം നടത്തിയത് അവനാണെന്ന് പൊലിസ് പറഞ്ഞു. പിതാവ് പ്രതികരിച്ചു.

സപ്തംബര്‍ എട്ടിനാണ് ഏഴുവയസുകാരനായ പ്രദ്യുമന്‍ താക്കൂര്‍ സ്‌കൂളിലെ ശുചിമുറിയില്‍ കൊല്ലപ്പെട്ടത്. സംഭവവുമായി ബന്ധപ്പെട്ട് നേരത്തെ സ്‌കൂള്‍ ബസ് ജീവനക്കാരനെ പൊലിസ് അറസ്റ്റു ചെയ്തിരുന്നു. ലൈംഗിക പീഡന ശ്രമത്തിനിടെ കൊല്ലുകയായിരുന്നുവെന്നാണ് ഇയാള്‍ പൊലിസിന് മൊഴി നല്‍കിയിരുന്നത്.