ദുബൈ: യാത്രാ വിലക്ക് ലംഘിച്ച് യു.എ.ഇ പൗരൻ കുടുംബത്തോടൊപ്പം ലബനാനിലേക്ക് പോയതിനെ തുടർന്ന് അന്വേഷണത്തിന് നിർദേശം. മറ്റൊരു രാജ്യം വഴിയാണ് ഇദ്ദേഹം ലബനാനിലേക്ക് പോയത്. ഈ നടപടിയിലൂടെ ഇദ്ദേഹം തന്റേയും കുടുംബത്തിന്റേയും  ജീവനാണ് അപകടത്തിലാക്കിയതെന്ന് അന്വേഷണത്തിന് ഉത്തരവിട്ട അറ്റോർണി ജനറൽ ഡോ. ഹമദ് അൽ ഷംസി പറഞ്ഞു. 

ചില രാജ്യങ്ങളിലേക്കുള്ള യാത്രാ വിലക്ക് സംബന്ധിച്ച് വിദേശ കാര്യ മന്ത്രാലയം പുറപ്പെടുവിച്ച തീരുമാനങ്ങൾ അനുസരിക്കണമെന്ന് അൽ ഷംസി രാജ്യത്തെ പൗരന്മാരോട് ആഹ്വാനം ചെയ്യുകയും അത്തരം നിർദേശങ്ങൾ പ്രാഥമികമായി പൗരന്മാരുടെ സുരക്ഷയാണ് ലക്ഷ്യമിടുന്നതെന്ന് വിശദീകരിക്കുകയും ചെയ്തു. യാത്രാ വിലക്കിന്റെ ഏതൊരു ലംഘനവും ക്രൈംസ് ആൻഡ് പെനാൽറ്റി നിയമത്തിലെ വ്യവസ്ഥകൾ പ്രകാരം തടവും പിഴയും, അല്ലെങ്കിൽ ഈ രണ്ടിലേതെങ്കിലുമൊന്നും ബാധകമാകുന്ന ശിക്ഷാർഹമായ കുറ്റമാണ്.

വിദേശ കാര്യ മന്ത്രാലയ (മോഫ) വെബ്സൈറ്റ് പറയുന്നതനുസരിച്ച്, യു.എ.ഇ പൗരന്മാർക്ക് ഇനി ഒരറിയിപ്പ് ഉണ്ടാകുന്നതു വരെ ലബനാനിലേക്ക് പോകാൻ അനുവാദമില്ല. ഇസ്രാഈലും ലബനാൻ ആസ്ഥാനമായ ഹിസ്ബുള്ളയും തമ്മിലുള്ള സംഘർഷം രൂക്ഷമാകുന്നതുമായി ബന്ധപ്പെട്ട സുരക്ഷ കണക്കിലെടുത്താണ് നടപടി.

യു.എ.ഇ നയതന്ത്ര ദൗത്യങ്ങൾ, അടിയന്തര ചികിത്സാ കേസുകൾ, മുൻകൂട്ടി അംഗീകൃത ഔദ്യോഗിക ശാസ്ത്രസാമ്പത്തിക പ്രതിനിധികൾ എന്നിവർ ഒഴികെ യു.എ.ഇ പൗരന്മാർക്കാർക്കും അഫ്ഗാനിസ്ഥാനിലേക്ക് യാത്ര ചെയ്യാൻ അനുവാദമില്ല. റഷ്യയുമായുള്ള യുദ്ധം കാരണം ഉക്രൈനിലേക്ക് യാത്ര ചെയ്യുന്നതിനെതിരേ യു.എ.ഇ പൗരന്മാർക്ക് മന്ത്രാലയം വെബ്സൈറ്റിലെ മറ്റൊരു യാത്രാ ഉപദേശത്തിൽ മുന്നറിയിപ്പ് നൽകിയിട്ടുണ്ട്.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക