റിയാദ്:രാജ്യത്ത് കുങ്കുമപ്പൂവ് ഉൽപ്പാദനം പ്രാദേശികവൽക്കരിക്കാനും ഇരട്ടിയാക്കാനും പദ്ധതിയുമായി സഊദി അറേബ്യ. സാമ്പത്തികമായി ഏറെ നേട്ടം നൽകുന്ന വിളയായത്തിനാൽ ദേശീയ സുസ്ഥിര കാർഷിക ഗവേഷണ വികസന കേന്ദ്രം ഇതിനുള്ള പദ്ധതി ആരംഭിച്ചിരിക്കുകയാണ്. ദേശീയ കാർഷിക പദ്ധതിയുടെ ചട്ടക്കൂടിനുള്ളിൽ പ്രകൃതിവിഭവങ്ങളുടെ സുസ്ഥിരത വർധിപ്പിക്കുന്നതിന്‍റെയും പ്രായോഗിക കാർഷിക ഗവേഷണം വികസിപ്പിക്കുന്നതിന്‍റെയും ഭാഗമാണ് സഊദി ഈ പദ്ധതി നടപ്പിലാക്കുന്നത്.

കുങ്കുമപ്പൂവ് ഉൽപാദനം പ്രാദേശികവൽക്കരിക്കാനുള്ള പദ്ധതിയുടെ ഭാ​ഗമാകുന്നത് റിയാദ്, ഖസിം, തബൂക്ക്, അൽബാഹ എന്നീ നാല് പ്രധാന പ്രവിശ്യകളാണ്. ഇതിലൂടെ രാജ്യത്ത് കുങ്കുമപ്പൂവിന്റെ കൃഷിയും ഉൽപാദനവും പ്രാദേശികവൽക്കരിക്കാനും വർധിപ്പിക്കാനുമാണ് കാർഷിക ഗവേഷണ വികസന കേന്ദ്രം ലക്ഷ്യംവെയ്ക്കുന്നത്.

കൂടാതെ കുങ്കുമപ്പൂവിന്റേ ഉൽപാദനത്തെ പ്രതികൂലമായി ബാധിക്കുന്ന ഘടകങ്ങൾ എന്തൊക്കെയാണെന്ന് പഠിക്കാനും വിലയിരുത്താനും പൂക്കളും തണ്ടുകളും ഉൽപ്പാദിപ്പിക്കുന്നതിനുള്ള ഏറ്റവും നല്ല നടീൽ തീയതികൾ നിർണയിക്കാനും ഉചിതമായ വളങ്ങൾ തെരഞ്ഞെടുക്കാനും ഈ പദ്ധതിയിലൂടെ സാധിക്കും. ചെടികളുടെ സാന്ദ്രത, നടീലിന്‍റെ ആഴം, ജലത്തിന്‍റെയും മണ്ണിെൻറയും ലവണാംശം, കുങ്കുമപ്പൂക്കൾ ഉൽപ്പാദിപ്പിക്കുന്നതിനുള്ള ഹൈഡ്രോപോണിക്, വെർട്ടിക്കൽ കൃഷിക്കുള്ള പോഷക പരിഹാരങ്ങൾ എന്നിവയും കാർഷിക ഗവേഷണ വികസന കേന്ദ്രത്തിന്റെ പഠനപരിധിയിൽ ഉൾപ്പെടുന്നതാണ്.

കുങ്കുമപ്പൂവ് സാമ്പത്തികമായി ലാഭം നൽകുന്ന വിളകളിൽ ഒന്നായി രാജ്യം കണക്കാക്കുന്നു. സഊദി കുങ്കുമപ്പൂവിന്റെ ഉൽപ്പാദനം ഇരട്ടിയാക്കാൻ ശ്രമിക്കുമ്പോൾ തന്നെ കൃഷിയെ പിന്തുണയ്ക്കുന്നതിനും മെച്ചപ്പെടുത്തുന്നതിനും രാജ്യത്തെ കാർഷിക ഉൽപാദന സമ്പ്രദായത്തിലേക്ക് അതിനെ പരിചയപ്പെടുത്തുന്നതിനും നിരവധി ശാസ്ത്രീയ ഗവേഷണങ്ങളും പഠനങ്ങളും നടത്താൻ ശ്രമിക്കുകയാണ്. ആധുനിക കാർഷിക സംഭവവികാസങ്ങൾക്കൊപ്പം നൂതനമായ കാർഷിക പരിഹാരങ്ങൾ വികസിപ്പിക്കുന്നതിനും പ്രോത്സാഹിപ്പിക്കുന്നതിനുമായി ദേശീയ സുസ്ഥിരതാ കാർഷിക കേന്ദ്രം നടത്തുന്ന ശ്രമങ്ങളുടെ ചട്ടക്കൂടിനുള്ളിലാണ് കുങ്കുമപ്പൂ കൃഷിയും ഉൾപ്പെടുത്തിയിരിക്കുന്നത്.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക