മലപ്പുറം: കണക്കില്‍ തിരിമറി കാണിച്ച് പണം തട്ടിയശേഷം ഒളിവിലായിരുന്ന കെ. എസ്. ആര്‍.ടി.സി കണ്ടക്ടര്‍ അറസ്റ്റില്‍. മലപ്പുറം കെ.എസ്.ആര്‍.ടി.സി ഡിപ്പോയിലെ കണക്കുകളില്‍ കൃത്രിമം കാണിച്ച് പണം തട്ടിയ കേസിലെ പ്രതിയായ കോട്ടയം കരിമ്പനി കിഴക്കേമുറിയില്‍ രാജേഷ് രാധാകൃഷ്ണ(29)നാണ് പിടിയിലായത്.
മലപ്പുറം കെ.എസ്.ആര്‍.ടി.സി ഡിപ്പോയില്‍ കണ്ടക്ടറായി ജോലി ചെയ്തിരുന്ന പ്രതി 2013-14 വര്‍ഷങ്ങളില്‍ കള്ളക്കണക്കുണ്ടാക്കി പല ദിവസങ്ങളിലെയും കളക്ഷന്‍ പണം മുഴുവനായും ഓഫിസില്‍ അടക്കാതെ തട്ടിയെടുത്തിരുന്നു.
ഇത്തരത്തില്‍ രണ്ട് ലക്ഷത്തോളം രൂപ അപഹരിച്ചുവെന്നാണ് കണക്ക്. സംഭവം പുറത്തായതിനെ തുടര്‍ന്ന് 2015 ല്‍ പൊലിസ് കേസെടുത്തതറിഞ്ഞ പ്രതി ഒളിവില്‍ പോവുകയായിരുന്നു.
ഇയാളെ ജോലിയില്‍ നിന്ന് പിരിച്ചുവിടുകയും ചെയ്തിരുന്നു. ഇതിനിടെ മുന്‍കൂര്‍ ജാമ്യത്തിനായി ഹൈക്കോടതിയെ സമീപിച്ചെങ്കിലും അപേക്ഷ കോടതി തള്ളി. എറണാകുളം, കോട്ടയം തുടങ്ങിയ സ്ഥലങ്ങളില്‍ രണ്ട് വര്‍ഷത്തോളമായി ഒളിവില്‍ കഴിഞ്ഞുവരുന്നതിനിടെയാണ് കഴിഞ്ഞ ദിവസം പിടിയിലായത്. മലപ്പുറം എസ്.ഐ ബി.എസ്. ബിനുവിന്റെ നിര്‍ദേശപ്രകാരം സ്‌പെഷല്‍ സ്‌ക്വാഡ് അംഗങ്ങളായ സ്രാമ്പിക്കല്‍ മുഹമ്മദ് ഷാക്കിര്‍, മന്‍സൂറലി മാര്യാട് എന്നിവരാണ് എറണാകുളത്തു നിന്ന് പ്രതിയെ അറസ്റ്റ് ചെയ്തത്.