തിരുവനന്തപുരം: കെ.എസ്.ആര്‍.ടി.സി ചെന്നൈയിലേയ്ക്കു സ്‌കാനിയ സര്‍വീസ് തുടങ്ങുന്നു. നവംബര്‍ പകുതിയോടെ തിരുവനന്തപുരത്തുനിന്നു സര്‍വീസ് ആരംഭിക്കുമെന്നാണ് വിവരം.
നടപടിക്രമങ്ങളെല്ലാം പൂര്‍ത്തിയായി. ചെന്നൈ സര്‍വീസ് ആരംഭിക്കുന്നതിനായി തമിഴ്‌നാട് മോട്ടോര്‍ വാഹന വകുപ്പുമായി കെ.എസ്.ആര്‍.ടി.സി ഏറെനാളായി ചര്‍ച്ച നടത്തിവരികയായിരുന്നു. കെ.എസ്.ആര്‍.ടി.സി വാടകയ്‌ക്കെടുത്തു സര്‍വീസ് നടത്തുന്ന 10 സ്‌കാനിയ ബസുകളില്‍ രണ്ടെണ്ണമാണു ചെന്നൈ സര്‍വീസിനായി ഉപയോഗിക്കുക. രണ്ടു പെര്‍മിറ്റിനു വേണ്ടിയാണ് തമിഴ്‌നാട് മോട്ടോര്‍വാഹന വകുപ്പിനെ കെ.എസ്.ആര്‍.ടി.സി സമീപിച്ചതെങ്കിലും ഒരെണ്ണം മാത്രമാണ് അനുവദിച്ചത്.
ഒരു പെര്‍മിറ്റുകൂടി ലഭിച്ചേക്കുമെന്നും അതിനുവേണ്ടി ശ്രമം നടത്തുകയാണെന്നും അധികൃതര്‍ അറിയിച്ചു. ഒരു പെര്‍മിറ്റുകൂടി ലഭിക്കുകയാണെങ്കില്‍ ചെന്നൈയിലേക്ക് മറ്റൊരു സര്‍വീസോ, വേളാങ്കണ്ണിയിലേക്ക് പുതിയ സര്‍വീസോ തുടങ്ങാനാണ് കെ.എസ്.ആര്‍.ടി.സി ആലോചിക്കുന്നത്.
ചെന്നൈയിലേയ്ക്കു സര്‍വീസ് നടത്തുന്നതിന് കെ.എസ്.ആര്‍.ടി.സിക്കു തമിഴ്‌നാടിന്റെ പെര്‍മിറ്റ് ലഭിക്കാതിരിക്കാന്‍ സ്വകാര്യ ബസ് ലോബി പ്രവത്തിച്ചിരുന്നതാണ് ഇതുവരെ തടസമായി നിന്നത്.
എന്നാല്‍ അതിനെ മറികടന്നാണ് ഇപ്പോള്‍ ഒരു പെര്‍മിറ്റെങ്കിലും നേടിയെടുക്കാന്‍ കെ.എസ്.ആര്‍.ടി.സിക്ക് കഴിഞ്ഞത്. ഇപ്പോള്‍ ആരംഭിച്ച സ്‌കാനിയ സര്‍വീസുകള്‍ നഷ്ടത്തിലാണെങ്കിലും ചെന്നൈ സര്‍വീസ് ആരംഭിക്കുന്നതു പ്രതീക്ഷയോടെയാണ്.