തിരുവനന്തപുരം: കായല്‍ കയ്യേറ്റ വിഷയത്തില്‍ മന്ത്രി തോമസ് ചാണ്ടിയുടെ രാജിയില്‍ തീരുമാനമെടുക്കാന്‍ നിര്‍ണായക ഇടതുമുന്നണി യോഗം ആരംഭിച്ചു. ഇടതുമുന്നണി യോഗത്തിനു മുന്നോടിയായി മുഖ്യമന്ത്രി പിണറായി വിജയന്‍, സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍, സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ എന്നിവര്‍ ചര്‍ച്ച നടത്തിയിരുന്നു. മുന്നണിയോഗത്തിനു മുന്‍പ് ധാരണയുണ്ടാക്കാനാണ് കൂടിക്കാഴ്ച്ച നടത്തിയത്.

അതേസമയം,സമ്മര്‍ദ്ദങ്ങള്‍ക്കിടയിലും ഗതാഗത വകുപ്പില്‍ നിന്ന് തോമസ് ചാണ്ടി രാജിവെക്കേണ്ടന്ന നിലപാടില്‍ ഉറച്ച് നില്‍ക്കുകയാണ് എന്‍.സി.പി. ഹൈക്കോടതിയിലെ കേസുകളില്‍ തീരുമാനം ആയതിനുശേഷം മാത്രം മതി രാജിയെന്നാണ് എന്‍.സി.പിയുടെ നിലപാട്. സി.പി.എം-സി.പി.ഐ നേതൃത്വങ്ങള്‍ രാജി ആവശ്യപ്പെട്ടിട്ടില്ലെന്ന് സംസ്ഥാന പ്രസിഡന്റ് പീതാബംരന്‍ മാസ്റ്റര്‍ അവകാശപ്പെട്ടു.

അതിനിടെ, താന്‍ തെറ്റൊന്നും ചെയ്തിട്ടില്ലെന്ന് ഇടതുമുന്നണിയോഗത്തിനു മുന്‍പ് ചേര്‍ന്ന എന്‍.സി.പി യോഗത്തില്‍ തോമസ്ചാണ്ടി വ്യക്തമാക്കിയിരുന്നു. മുഖ്യമന്ത്രി തന്നോട് രാജി ആവശ്യപ്പെട്ടിട്ടില്ലെന്നും തനിക്കെതിരെ ഒരു റിപ്പോര്‍ട്ടുമില്ലെന്നും ചാണ്ടി അറിയിച്ചു.

എ.ജിയുടെ നിയമോപദേശം തോമസ്ചാണ്ടിക്ക് എതിരായതോടെയാണ് രാജിയിലേക്ക് കാര്യങ്ങള്‍ എത്തുന്നത്.

വെള്ളിയാഴ്ചയാണ് അഡ്വക്കറ്റ് ജനറല്‍ സുധാകര പ്രസാദിന്റെ നിയമോപദേശം സര്‍ക്കാരിനു ലഭിച്ചത്. ആലപ്പുഴ ജില്ലാ കലക്ടര്‍ ടി.വി അനുപമയുടെ റിപ്പോര്‍ട്ടിലെ കണ്ടെത്തലുകള്‍ തള്ളിക്കളയാന്‍ കഴിയുന്നതല്ലെന്ന് നിയമോപദേശത്തില്‍ പറയുന്നു. റിപ്പോര്‍ട്ടിനു നിയമസാധുതയുണ്ട്. റിപ്പോര്‍ട്ടിന്റെ അടിസ്ഥാനത്തില്‍ സര്‍ക്കാരിന് തുടര്‍നടപടികളിലേക്ക് പോകേണ്ടിവരുമെന്നും നിയമോപദേശം പറയുന്നു.