ജറൂസലം: ഇറാനിലുണ്ടായ ഭൂചലനത്തില്‍ സഹായ വാഗ്ദാനവുമായി ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു. ഇറാനുമായി അഭിപ്രായ ഭിന്നതകളുണ്ടെങ്കിലും മാനുഷിക സഹായത്തിന് തടസങ്ങളൊന്നുമില്ലെന്നും നെതന്യാഹു പറഞ്ഞു. വടക്കന്‍ അമേരിക്കയിലെ ജൂത സംഘടന ലോസ് ആഞ്ചലസില്‍ നടത്തിയ പരിപാടിയില്‍ വിഡിയോ കോണ്‍ഫറന്‍സിലൂടെ സംസാരിക്കുകയായിരുന്നു അദ്ദേഹം. റെഡ്‌ക്രോസ് മെഡിക്കല്‍ സഹായത്തോടെ ഭൂചലനത്തില്‍ ഇരയായവര്‍ക്ക് സഹായം വാഗ്ദാനം ചെയ്തിട്ടുണ്ട്. ഇറാനിലെ ജനങ്ങളുമായി വിയോജിപ്പില്ല. ഇറാന്‍ ഭരണകൂടത്തെ മാത്രമേ എതിര്‍ക്കുന്നുള്ളൂവെന്ന് അദ്ദേഹം പറഞ്ഞു. എന്നാല്‍ നെതന്യാഹുവിന്റെ സഹായ വാഗ്ദാനം ഇറാന്‍ തള്ളിയതായി ഇസ്‌റാഈല്‍ മാധ്യമങ്ങള്‍ റിപ്പോര്‍ട്ട് ചെയ്തു.