തിരുവനന്തപുരം: രാജ്യത്താകെ പുതിയ ചരക്ക് സേവന നികുതി ഏര്‍പ്പെടുത്തിയതിന്റെ പശ്ചാത്തലത്തില്‍ സംസ്ഥാനത്തിന്റെ റവന്യൂ വരുമാനത്തില്‍ ഉണ്ടായത് വന്‍ ഇടിവ്. ഇത് സംസ്ഥാനത്തെ വികസന പ്രവര്‍ത്തനങ്ങളെയാകെ ബാധിക്കും. മാത്രമല്ല ശമ്പളവും പെന്‍ഷനുകളും നല്‍കുന്നതില്‍പോലും സംസ്ഥാന സര്‍ക്കാര്‍ വരും ദിവസങ്ങളില്‍ വെല്ലുവിളി നേരിടും. സാമ്പത്തിക പ്രശ്‌നം നേരിടാന്‍ സര്‍ക്കാരിനു മുന്നില്‍ മറ്റൊരു പോംവഴിയും ഇല്ലാത്തതിനാല്‍ വികസന പ്രവര്‍ത്തനങ്ങള്‍ക്കായി മാറ്റിവച്ചിട്ടുള്ള തുകയില്‍ വെട്ടിക്കുറവ് വരുത്തുക മാത്രമാണ് ചെയ്യാന്‍ കഴിയുന്നതെന്ന് വിദഗ്ധര്‍ ചൂണ്ടിക്കാട്ടുന്നു.
സാമ്പത്തിക പരാധീനത കാരണം ധനകാര്യ വകുപ്പ് ഇതിനകംതന്നെ ട്രഷറി നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. ഒരു ദിവസം പരമാവധി 50 കോടി രൂപ മാത്രം ട്രഷറിയില്‍ നിന്നു ചെലവിടാനാണു ധനവകുപ്പിന്റെ തീരുമാനം. ശരാശരി 100 കോടി രൂപ വരെയാണു മുന്‍പു ട്രഷറിയില്‍ നിന്നു വിതരണം ചെയ്തിരുന്നത്. വന്‍തുകയുടെ ബില്ലുകള്‍ക്ക് ഒരു കാരണവശാലും പണം നല്‍കരുതെന്നു ട്രഷറി ശാഖകള്‍ക്കു നിര്‍ദേശം നല്‍കിയിട്ടുണ്ട്.
സാമ്പത്തിക വര്‍ഷത്തിന്റെ അവസാനം മാത്രം വര്‍ധിക്കുന്ന പദ്ധതിച്ചെലവ് നേരത്തെ വര്‍ധിച്ചതും സാമ്പത്തിക പരാധീനതയ്ക്കു കാരണമായിട്ടുണ്ട്. ജി.എസ്.ടിയിലെ പ്രശ്‌നങ്ങള്‍ പരിഹരിച്ചശേഷം സംസ്ഥാന സര്‍ക്കാരിനുള്ള ജി എസ്ടി നഷ്ടപരിഹാരം രണ്ടു മാസത്തിലൊരിക്കല്‍ മാത്രമേ ലഭിക്കൂ. ഈയിനത്തില്‍ മാത്രം 1000 കോടിയോളം രൂപയുടെ കുറവ് ഈ മാസമുണ്ടായി.
ഈ 1000 കോടി രൂപ ഡിസംബര്‍ അവസാനത്തോടെ മാത്രമേ ലഭിക്കൂ. ഇതും പ്രശ്‌നങ്ങള്‍ രൂക്ഷമാകാന്‍ കാരണമായി. ട്രഷറി നിയന്ത്രണം രണ്ടു മാസത്തേക്കുകൂടി തുടരാനാണ് ധനവകുപ്പ് നിര്‍ദേശം നല്‍കിയിരിക്കുന്നത്. ഇതാകട്ടെ സാമ്പത്തിക പ്രശ്‌നം പെട്ടെന്ന് അവസാനിക്കില്ലെന്ന സൂചനയാണ് നല്‍കുന്നത്.
പരിധി കടന്നതിനാല്‍ പൊതുവിപണിയില്‍നിന്നും കടമെടുക്കുന്നതിനുള്ള സാധ്യതയുമില്ല. പ്രതിശീര്‍ഷ മൊത്തവരുമാനത്തിന്റെ മൂന്നു ശതമാനം മാത്രമാണ് സംസ്ഥാനത്തിന് കടമെടുക്കാന്‍ കഴിയുക. ഇതാകട്ടെ കഴിഞ്ഞ ഓണക്കാലത്ത് 8,500 കോടി രൂപ കടമെടുത്തതിലൂടെ പരിധിക്കടുത്തെത്തി. ഇനി സംസ്ഥാനത്തിന് 400 കോടി രൂപ മാത്രമാണ് കടമെടുക്കാനാവുക. സാമ്പത്തിക വര്‍ഷത്തിന്റെ അവസാന ത്രൈമാസത്തിലാണ് ഇത് സാധ്യമാകുക. അതിനായി ജനുവരി വരെ കാത്തിരിക്കേണ്ടിയും വരും.