ഹൈദരാബാദ്: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ മകള്‍ ഇവാന്‍ക ട്രംപിന്റെ സന്ദര്‍ശനവുമായി ബന്ധപ്പെട്ട് തെരുവോരങ്ങളില്‍ നിന്ന് ഒഴിപ്പിച്ച യാചകരുടെ കൂട്ടത്തില്‍ എം.ബി.എക്കാരിയും അമേരിക്കന്‍ ഗ്രീന്‍കാര്‍ഡുള്ള വീട്ടമ്മയും.

 ഇവാന്‍കയുടെ സന്ദര്‍ശനവുമായി ബന്ധപ്പെട്ട് നഗരം യാചക മുക്തമാക്കുക എന്ന ലക്ഷ്യത്തോടെ ആയിത്തോളം യാചകരെയാണ് ഹൈദരബാദിലെ തെരുവോരങ്ങളില്‍ നിന്ന് നീക്കിയത്. സ്ത്രീകളെ ചെര്‍പ്പള്ളി ജയിലിനടുത്ത അനാഥാശ്രമത്തിലേക്കും പുരുഷന്‍മാരെ ചഞ്ചല്‍ഗുഡയിലേക്കുമാണ് മാറ്റിയത്. യാചകരെ മാറ്റുന്ന നടപടിക്കിടെയാണ് ഇരുവരും അധികൃതരുടെ ശ്രദ്ധയില്‍ പെടുന്നത്. പൊലിസുമായി സ്ഫുടമായ ഇംഗ്ലീഷില്‍ ഘോരഘോരം വാദിക്കുകയായിരുന്നു ഇവര്‍. തുടര്‍ന്ന് പൊലിസ് നടത്തിയ അന്വേഷണത്തിലാണ് ഇവരുടെ കഥ ചുരുളഴിഞ്ഞതും ബന്ധുക്കളെ കണ്ടെത്തിയതും.

എം.ബി.എക്കാരിയായ 50കാരിയായ ഫര്‍സോന ലണ്ടനില്‍ അക്കൗണ്ടന്റായി ജോലി നോക്കിയിരുന്നയാളാണ്. മകന്‍ ഇപ്പോള്‍ യു.എസില്‍ ആര്‍ക്കിടെക്റ്റാണ്. ഹൈദരാബാദില്‍ സ്വന്തമായി വീടുണ്ട്. ഭർത്താവിന്‍റെ മരണശേഷം മാനസിക പ്രശ്നം കണ്ടു തുടങ്ങിയ ഇവർ ഒരു പുരോഹിതന്റെ നിര്‍ദ്ദേശ പ്രകാരം ചികിത്സയുടെ ഭാഗമായാണത്രെ ദര്‍ഗക്കു സമീപം യാചിക്കാനെത്തിയത്. 

റാബിയ ബസീറ (44) ഗ്രീന്‍ കാര്‍ഡ് സ്വന്തമായി ഉള്ളയാളാണ്. തന്റെ സ്വത്തുക്കള്‍ സഹോദരങ്ങള്‍ ബലമായി തട്ടിയെടുത്തതാണ് റാബിയയുടെ മാനസിക നില തകരാറിലാക്കിയത്. തുടര്‍ന്നാണ് അവര്‍ ദര്‍ഗക്കു സമീപമെത്തിയത്.

രണ്ടു പേരെയും ബന്ധുക്കള്‍ക്ക് കൈമാറിയതായി പൊലിസ് പറഞ്ഞു.